|
|
Бүген кемнәр туган
|
|
Архив
|
16.04.2012 Ир белән хатын
Зинаны ялган никах аклыйТагын күпхатынлылык турында. Ике хат, ике фикер. Без – мөселман гаиләсе. Уфада яшибез. Мин – тәрбияче, ирем – инженер. Өйләнешүебезгә 15 ел. Ике кыз үстерәбез. Өйдә барыбыз да намаз укый. Мәчеткә йөрибез. Бер-беребезне яратып яшәсәк тә, былтыр ирем хыянәт итеп тотылды. Ләкин мин тавыш чыгармадым. Ул да мине яратуын, минсез яши алмавын, Оля янына күченмәячәген тәкрарлады. Ләкин ике ирдән аерылган, ике балалы 40 яшьлек сөяркә Оля иремә нык сарылды. Хәтта мәчеткә барып Мәрьям исемен куштырып кайтканнар аңа. Ирем гаиләдән китәргә теләмәде, зина кылып йөрүеңне ташла дисәм, Оляны икенче хатын итеп никах укытам дип яный башлады. Мин – сау-сәламәт хатын, әлбәттә, моңа ризалык бирмәдем. Хәтта алар мөрәҗәгать иткән хәзрәткә чылтыратып, хәлне аңлаттым. Иремнең нибары 19 мең акча эшләвен, ике гаиләне тарта алмаячагын әйттем. Оля бездән 100 чакрым ераклыктагы икенче шәһәрдә яши, ул бармак белән чакырса, ирем эшен ташлап шунда китә дә бара, кунып та кайткалый. Эшеннән әллә ничә тапкыр кисәтү дә ясадылар. Ләкин ул: “Тыела алмыйм, аякларым шунда ала да китә”, – дип аңлата. Ул Оля яныннан кайткач, мин үземне начар хис итәм, хәлем китә. Догалар укып кына тынычланам. Ярты ел буе тамагыма төер тыгылып, аппетитым югалып, 6 килога ябыктым, кеше төсе калмады. Ә ирем, киресенчә, 5 килога тазарды. Мин ишетергә теләмәсәм дә, гел Оля, аның тәне, аның нинди шәп сөяркә булуы турында искә төшереп торды, мактанып, фотоларын күрсәтте. Яңа ел каникуллары вакытында ирем, эш табып, Казанга китте. Баксаң, ул анда сөяркәсе белән барган икән. Мәчеткә кереп, никах укытып кайтканнар. Шаккаттым. Алар үзләрен яңа исемнәре белән – Сөләйман һәм Мәрьям дип танытканнар. Һәм шул исемгә таныклык алганнар. Хәзер шулай сөяркәсе белән килгән гаиләле ирләргә гаилә хәле, хатынының ризалыгы, гаиләсенең хәбәрдарлыгы турында сорашмыйча гына никах укыйлар микәнни? Никах вакытында мәчеттә ике шаһит тә табылган. Безнең динебез гаиләдә тугрылык, пакьлек, намус ягында бит. Миңа бу хурлыкка ничек түзәргә? Ирем миннән аерылырга теләми. Хәзер никахлы зиначы аяк терәп үзенекен сөрә, мин дин кануннарыннан чыкмадым ди. Миңа бу буталчыктан чыгарга ярдәм итегезче. Газета укучылар, сездән киңәшләр көтәм. Минем электрон адресым: madina.gubaydullina@mail.ru
МӘДИНӘ. Уфа.
Бу бит Аллаһы сынавы... Барып чыктык. Намаз укучы мөселман ире хатынына хыянәт итә. Ышанасы килми, ләкин Уфадан Мәдинә ханым иренең гамәлләре турында бик тәфсилләп язгач (“Зинаны ялган никах аклыймы?”, “Т.Я.”, 26 гыйнвар), ышанмый мөмкин түгел. Сөяркәсе турында хатынына сөйләп, ул аны бик нык рәнҗеткән, елаткан. Хуш, ир кеше үзенең гаебен аңлап, тәүбәгә килгән дип саныйк – ул зинаның ярамаганлыгына төшенеп, сөяркәсе белән никах укыткан. Тик хат авторы язганча, болай да ярамый икән бит. Мәдинә ханым, хаклыкны ишетү, әлбәттә, нык авырдыр, шулай да тыңлап карагыз әле. Икенче хатын алу өчен беренче хатынның ризалыгы кайчаннан бирле кирәк соң ул? Белгәнебезчә, Пәйгамбәребез вакытында хатыннарыннан ризалык таләп ителмәгән. Ирегезнең 19 мең сум гына акча алуы борчый икән сезне, имеш, ул шул акчага ике гаиләсен туендыра алмый. Кемнәрдер 3-4 мең сумга яшиләр бүген. Ә кайбер чит илләрдә балалар ачлыктан кырыла. Икенче хатынны гаепләүчеләр күп бүген, гәрчә аның монда бернинди гөнаһы булмаса да. Тәкъдирдә язылганны күрәбез бит. Мәдинә ханым, сабырлык күрсәтеп, Аллаһының шушы сынавына риза булып яшәсәгез, иншалла, бәлкем җәннәтнең үзегез теләгән ишегеннән керерсез. «Сиңа нәрсә, үз башына төшмәгән кеше аңламый инде ул», – дияргә ашыкмагыз. Кирәгеннән дә ныграк аңлыйм, чөнки үзем дә иремнең ике хатынының берсе. Тик моны Аллаһның сынавы буларак кабул итәм. Сез әйткән “буталчык”тан чыгу юлы бер генә – сабыр булып, барысын да Аллаһыга тапшырыгыз, бары тик Аңардан гына сорагыз. Ярдәме тими калмас.
ГАЙШӘ. Казан.
|
Иң күп укылган
|