Казанда мөселманча “Брейн-Ринг” узды (ФОТО)

Шушы көннәрдә Казанның “Хәзинә” музеенда, төрле уку йортларыннан җыелган мөселман яшьләре өчен “Брейн-ринг” уены узды. Уенга Россия Ислам университетыннан, “Мөхәммәдия” мәдрәсәсе , Казан Федераль Университеты, “Сәләт” оешмасы ,“Алтын урта” мөселман яшьләре берлеге, «ШТК» яшьләр оешмасыннан һәм Казанның төрле ВУЗларыннан мөселман яшьләре командалары килгән иде. Катнашучыларның саны 80гә якын булды.

Әлеге уенны Актив Мөселман Яшьләре берлеге, Татарстан Диния Нәзарәте, Мөслимәләр Союзы һәм Кол Шәриф мәчете оештырды.

Уенчыларның барысы да яхшы әзерләнгәннәр. Сорауларга озак уйлап тормый гына җавап бирергә тырыштылар. Ә сораулар авыр иде, чөнки алар дингә генә түгел, ә дөньяви белемнәргә дә кагылышлы булды. Сорауларның күпчелеге Татарстан тарихы, татарларның үткәне һәм бүгенгесенә бәйле.

Беренче раундтан соң ярымфиналга чыгучы командалар билгеләнелде. Ярымфиналда “ШТК”, “Сөләйман”, “Алтын урта”, Казан фидераль университеты командалары үзара көч сынаштылар. Ә финалга исә ике команда чыкты ул “ШТК” һәм Казан университеты командасы.

Шактый озак көч сынашканнан соң “ШТК” җиңүгә иреште. Җиңүчеләргә тәмле бүләкләр тапшырдылар. Мондый башваткыч уеннарны даими оештырырга исәп бар.

1

2

3

4

5

6