Җырлап кына яшисе килә!

Әлфинә Әзһәмова сәхнәдә үзен матур, тәртипле итеп тота белүче җырыларның берсе. Үзенчәлекле тавыш иясе, тиз арада Һинд кызы образына керергә сәләтле ханымны күпләр ярата бездә. Киенүе генә түгел, үз – үзен тотышы, кыяфәте дә Һинд кызларын хәтерләтә. Хәтта ике каш арасындагы миңе дә үзенеке аның!

Җырчының популярлыгы, аның халык мәхәббәтен яулавыннан тора, диләр. Әлфинә дә халык арасында бик популяр. Аның җырларын бик яраталар бездә. Концертлары да көтелеп алына. Концерт дигәннән... 3 февраль көнне Әлфинә Әзһәмова Казан тамашачысына өр – яңа концерт  программасы әзерли. Уникс концертлар залында узачак бу кичәдә тамашачыга җырчының яңа альбомында урын алган җырларны ишетү мөмкинлеге дә туачак.  Кыска гына вакыт эчендә үзенчәлекле тавышы, тыйнаклыгы, затлылыгы, фикер төрлелеге белән халык мәхәббәтен яулады Әлфинә. Моның сере нидә икән?

– Тамашачыны бик яратам мин. Үзең аларны яратмый торып кына, халыктан үзеңне яраттырып булмый ул.

– Әлфинә, әйтегез әле, иҗат юлына кереп китәргә нәрсә этәргеч булды?

– Ходай тарафыннан сәләт бирелгән икән, аның өстендә эшләргә,  үстерергә кирәк. Дөрес, сәхнәгә соңга калып чыктым. Шулай да, югалып калмадым. Кечкенәдән сәхнәгә чыгып җырлыйсым килә иде. Тик гел каршылыклар чыгып торды. Йә буең кечкенә дип, йә башка сәбәпләр аркасында каршымда ишек ябалар иде. Тырыша торгач барыбер ирештем үземнекенә.

– Татар эстрадасына ничек килеп кердегез?

– Халыкка беренче тавышым танылды минем. Яшь чакта да җырлый идем, дусларым  гел әйтәләр иде, сиңа җырчы булырга кирәк, әрәм булып йөрисең дип. Буем кечкенә булганлыктан читенсендем. Шулай да радиога бер – ике җыр яздырып илттем. Җырларым тиз популярлашып китте. Тора – бара шулай халыкка чыга башладым.

– Сез сәхнәгә олыгаеп чыктыгыз. Ничек уйлыйсыз, җырчы кеше карьерасын яшьтән башларга тиешме, әллә олыгаеп та теләккә ирешеп буламы?

– Әгәрдә син талантлы, үз эшеңнең остасы икән, сәхнәгә кайчан чыксаң да соң түгел, минемчә.

– Ә сез үзегезне “үз эшегезнең остасы” дип саныйсызмы?

– Шөкер, талант бар, сәләт бар. Җырларымны тыңлыйлар, үземне яраталар. Җырчы кешегә тагын ни кирәк ? Моның кадәре булгач нишләп санамаска ди? Иң мөһиме тамашачы мәхәббәтен яулау!

– “Һинд кызы” образын кем уйлап тапты?

– Тамашачы, дөресрәге радио тыңлаучылар. Җырларым радиода яңгырый башлау белән популярлашты. Тыңлаучылар исемемне истә калдырмасалар да, тавышымнан һинд кызына ошатканнар. Радиога шалтыратып, “Татарча җырлаучы Һинд кызын куегыз әле” – диючеләр шактый иде диләр. Бу образ да әнә шулай, гади тамашачы фикере белән барлыкка килде.

– Барлыгы ничә альбомыгыз чыкты?

– 5. DVD формата чыканнары 15кә тула.

– Җырлап йөреп тамак туйдырып буламы?

– Аллага шөкер, җырлап тамак туйдырырлык акча эшләп була дип әйтә алам. Концертларыма да зал тутырып киләләр, дискларның чыкканын көтеп кенә торалар. Шулай булганда гел җырлап кына яшисе килә икән ул!