«Матбугат.ру»да Яңа елның беренче секундларында уздырылган бәйгедә унбиштән артык кеше катнашты

Кем дә кем 2012 елның беренче секундларында иң беренче булып комментарий яза, шуңа бүләк вәгъдә иткән идек: кәрәзле телефонга 300 сум күчтәнәч. Яңа елны “Матбугат.ру” белән каршылаучылар шактый булды, бәйгедә катнашучыларның саны гына да 15тән артык. Ә җиңүчеләр икәү:

“Яңа ел белән!!! Бәхетләрегез ташып торсын” дип язган Алсу һәм “Әссәләмү галәйкүм, барыбызга да Аллаһның рәхмәте вә бәрәкәте булсын” дигән коммент авторы Хаҗия. Икесенең дә хәбәрләре 00:00:01 вакыты белән килде. Бәйгенең шартлары буенча бу очракта бүләк икегә бүленде һәм ияләренә җибәрелде.

Җиңүчеләр белән танышып узыйк:

Алсу ханым электронкадан безгә болай дип язып җибәрде:

- Исәнмесез. Мин Баянова Алсу. Түбән Кама шәһәрендә яшим. Укучыларга белем бирәм, ягъни укытучы булып эшлим. Малай һәм кыз үстерәм. Мин сезнең сайттагы язмалар белән танышып барам, үз фикерләремне дә язгалыйм. Җиңүче булуыма бик шат. Уйламаган да идем. Барлык “матбугат”чыларны Яңа 2012 ел белән котлыйм. Изге теләкләребез тормышка ашсын иде. Ходай сәламәтлектән аермасын. Уңышлар сезгә!

Монысы Хаҗия ханымнан килгән хат:

- Аллаһтан иминлек вә бәрәкәт булсын. Мин - Хаҗия. Татарстаннан. “Матбугат.ру” укучыларына иман байлыгы, хәерле гамәлләр кылырга һәм хәерле бәрәкәт насыйп булсын. Йә, Раббым, ялгызларга хәерле никах, авыруларга шифа, авыр хәлләргә юлыгучыларга җиңеллек вә сабырлык бир. Калебләребезне чистарт, иманыбызны куәтлә, тәкъвәлегебезне арттыр. Һәммәбезгә, Раббым, туры юлыңда булырга насыйп ит. Аллаһтан иминлек вә бәрәкәт теләп калам.

Ә бәйгедә җиңә алмаган барлык катнашучыларны Яңа ел белән котлыйбыз. Уенда катнашуыгыз, әлбәттә, бүләк хакына булмагандыр. Кәҗәсе түгел, мәзәге! 2012 елда тагын да күбрәк бәйгеләр үткәрербез әле. Иң мөһиме, бергә булыйк! ))