Яңа төр уку Йорты

Быел өлкә мәгариф системасында “Учительский дом” дигән яңа проект сынау үтә. Кызыл Октябрь районының Куйсуы авылында өлкәдә бердәнбер булган яңа төр уку йорты 1 сентябрьдән эшли башлады.

 Бу яңа эш 17 ел башлангыч классларны укыткан Рамилә Хәсәновага (фотода) йөкләнгән. Проект буенча бу максатка хөкүмәт аерым йорт салырга тиеш, яисә, бөтен шартлары туры килсә, укытучы үз өендә унбишкә кадәр бала җыеп укыта ала. Рамиләнең укучылары әлегә икәү генә: беренче класста Фәнис Юсипов һәм Илнур Хәсәнов.

 “Киләсе елда беренче класска тагын ике кыз көтелә. Алдагы берничә елга да шулай ук. Балаларым, икәү генә булсалар да, бик кызыксынып укыйлар. Дәресләр беткәч уйныйлар. Яңа эш бит, тәҗрибә җитешми, һәр көн районга чабам, киңәшләшеп торам”, - ди Рамилә.

 Аңа тулы бер мәктәп администрациясе вазифаларын үтәргә туры килә шул: директор да, пешекче дә, җыештыручы да, завхоз да берүзе. Балалар икәү генә булса да, кәгазь эше чын мәктәпнеке. Ә укыту өчен бөтен шартлар бар аның өендә. Иркен залны класс бүлмәсе итеп җиһазландырган – парталар, өстәл, компьютер куйган. Класс тактасы, диварда стендлар, таблицалар. Укытучы көненә багышлап стенгазета да чыгарганнар инде.

 Проект әлегә беренче адымын ясый, бу яңа эштә Рамилә пионер булып чыкты. Җитешсез яклары да юк түгелдер, уңай яклары да бардыр. Иң зур уңайлык – баланы иртүк торгызып юлга җибәрергә кирәкми, башлангыч белемне үз авылында ала. Ә Рамиләгә эшендә тик уңышлар телисе кала.