Бәхет кесәдә яши?!

Россия халкы бәхетсез, тормыш сыйфатыннан канәгать түгел. Германиянең Киләчәк мәсьәләләре фонды үткәргән сораштыру нәтиҗәләре әнә шулай ди.

Киләчәк мәсьәләләре фонды 13 илдә 14 ел буе үткәргән тикшеренүләренең нәтиҗә­сен ачыкларга булган. Сораштыруда катнашкан 15 меңгә якын кешенең иң бәхетлеләре Даниядә яши икән. Әлеге ил халкының 96 проценты тормышларыннан канәгать, бар нәрсәгә дә позитив караш белдерергә тырыша. Бәхеттә-шатлыкта яшәү­челәр исемлеген грек­лар (80 процент) дә­вам итә. Итальяннар (79 процент), французлар (77 процент), Голландия һәм Британия халкы (72 процент) да тормышларыннан зарланмый. Төркия һәм сораштыру “хуҗасы” булган Гер­маниядә нәти­җәләр андый ук позитив түгел, анда яшәүче­ләрнең яртысы гына үзен бә­хетле дип саный. Бездә исә халыкның 37 проценты гына, “бәхет кошын” тоттым, дигән фикердә. Калганнарга гел нәрсәдер ошамый, нидер җитми, тормышлары шатлык ките­рердәй түгел.

Бәхет байлыкта түгел, ди­сәләр дә, кесә­лә­рендә евро шыгырдап торучылар үзен бер дә бә­хетсезләр рәтенә кертмәгән. Айлык кереме 3 мең 600 евродан (якынча 145 мең сум) күбрәк булучыларның 76 проценты тормышларыннан канәгать. Акча янчыгы юкару белән бәхетлеләр рәтләре дә сирәгәя. Әлеге сораштыруда Россия нәтиҗәлә­ренең ник шундый булуы аңлашыла болай булгач.