Татар кызы Лилия — Кытайда уңган килен

Күптән түгел Кытайның Колҗа шәһәрендә татар туе гөрләп узды. Татарстан Республикасы Яшел Үзән районы Акъегет авылы кызын Кытай татары - Кодрәт Казан шәһәрендә эзләп таба.

Бер-беребезне күптән белә идек. Университетта таныштык. Аның өчен мин остазым Әлфия Юсуповага рәхмәтлемен, - ди бәхетен тапкан Кодрәт.

Кытайдан КДУның татар филологиясе һәм тарихы факультетына белем алырга килгән егет университет стеналары арасында мәңгелек ярын очратырмын дип уйламагандыр да. Бер елга якын очрашып йөргәннән соң, 2010 елның сентябрь аенда Казанда никах укытып, туйлар үткәргәннәр. Казандагы туйда Лилиянең туганнары күп булса, «Кытайга Лилиянең туганнары килә алмады», - дип уфтана яшьләр.

Яшь гаиләнең туй фотоларын карап утырганда, кәләшнең калфагына, кияүнең түбәтәйле булуына игътибар иттем. Колҗа — татар диаспорасы яшәгән шәһәр. Милли киемнәр, милли орнаментларны алар кытайлылар арасында да саклап калган. Бездә сәхнәдә генә күренгән калфакларның Кытайда кәләш аксессуары буларак кулланулары игътибарга да, мактауга да лаек.

Лилия кигән калфакны каенана - минем әнием — Зөлфия Чапаева уйлап тапты. Калфак Кытай татарлары өчен гадәти. Аны милли бәйрәмнәрдә, сабантуйларда кияләр, - дип ачыклык кертте яшь кияү.

Яшь татар гаиләсе, насыйп булса, Казанда төпләнергә уйлый. Кодрәт һәм Лилия Камал гаиләсенә сүнмәс мәхәббәт һәм бәхет телибез!