Күпме торабыз?

Россиядә һәр нәрсәнең үз бәясе бар. Хәтта кеше гомеренең дә. Стратегик тикшеренүләр үзәге китергән мәгълүматларга караганда, ул уртача алганда 4,5 млн сум тора.

Сораштыруда Россиянең 36 шәһәрендә яшәүче 5,2 мең кеше катнашкан. Гомер “бәя­се” дигәндә, кеше үлеме очрагында аның туганнарына тү­ләнергә тиешле акча күләме күздә тотыла. Иң күп матди компенсацияне ир-атлар, 40-50 яшьлек кешеләр, эшмәкәр һәм байлар таләп итә. Уртача алганда, ир-атлар үз гомерен 5,7 млн сумлык дип бәяли. Хатын-кызлар исә 3,1 млн сумга да риза. 18-30 яшьлекләрнең нәфесләре дә әллә ни югары түгел: үлә-нитә калсалар, үзләре өчен 3,2 млн сум акча чыгарып салуларын телиләр.

Шунысы кызык: югары белеме булмаганнар үз гомерен дипломлы белгечнекенә караганда кыйммәтрәк дип саный. Студент һәм эшсезләр тирә­сендә дә охшаш вәзгыять. Югары уку йортында белем алучылар үлемнәре өчен түләнгән компенса­ция­нең 2,6 млн сум булуына риза булса, “трай тибеп йөрүче” эшсезләр 4,8 млн таләп итә. Шулай да үз-үзебезне бәяләү дәрә­җәсе чит ил халкыныкыннан әлегә бик түбән икән. Икътисадый яктан үсеш алган илләрдә кеше гомере өчен каралган компен­сацияләр 500 мең доллардан башлана. Россия акчасына әйләндергәндә, бу якынча 15 млн сум. Үзебезне күбрәк яратырга кирәк, җәмәгать.