Безгә килегез

Россиядә тормыш яхшыра. “Дөнья фонды” исемле бәйсез оешма тарафыннан төзелгән иң тотрыксыз илләр исемлегендә аның берничә баскычка күтәрелүе әнә шуңа өметләнергә мөмкинлек калдыра.

Әлеге исемлек теге яки бу дәүләтнең демографик, сәя­си, икътисадый һәм иҗтима­гый проблемаларын ис­тә тотып төзелә. Дүртенче ел рәттән күңелсез беренчелекне Сомали алган. Бу илдә законсызлык һәм җинаятьче­лек хө­кем сөрә. Финляндия исә моңа чаклы берничә тапкыр дөньяның иң тыныч иле дип танылган Норвегияне ахырдан икенче урынга кысрыклап чыгарган. Моңа соң­гысының икътисадый һәм демографик күрсәткечләре тотрыксызлыгы сә­бәпче булган.

“Дөнья фонды” төзегән исемлектә барлыгы 177 ил бар. Нәтиҗә чыгарганда, теге яки бу дәүләт халкы тормышына тәэ­сир иткән бер генә җитди вакыйга да игътибарсыз калмый. Мисал өчен, Гаити, Япония, Яңа Зеландия, Нигерия кебек ил­ләрдәге вәзгыятьнең былтыргы нәтиҗә­ләр белән чагыштырганда начаррак дип табылуы андагы табигать көчләренең “баш күтәрүе” белән аңлатыла. Греция һәм Италиядәге икътисадый кризис андагы халыкның үз хөкүмәте белән канәгать булмавына сәбәпче булган. Нәти­җә­дә, бу илләр дә исем­лектә аска тәгәрәгән. Россия исә, ки­ресенчә, өскә үрмәлә­вен дәвам итә. 2009 елда безнең ил 71 нче урында булса, былтыр 80 гә менгән. Быел әлеге күрсәткеч­ләр тагын ике баскычка яхшырган.