Татарстанның халык, Россиянең атказанган артисты Наил Шәйхетдинов

Бик күп язылган аның хакында. Тудырган һәр образы тамашачылар, журналистлар һәм тәнкыйтьчеләр игътибарыннан читтә калмый. Тинчурин театрына күпләр Наил Шәйхетдиновны күрер өчен дип килә. Ул иҗат иткән авыл картлары – кырыс заман йоткан авылча самимилек, ихласлык үрнәге. Мартта Наил абыйга 70 яшь тулды. Юбилеен ул Хаҗи әфәнде булып каршылады.

Бүген без Наил абый Шәйхетдиновның гаилә альбомы аша аның сәхнәдән тыш тормышына да күз салырбыз. Яшь чагын, дусларын, туганнарын күрербез.

«Сәхнә тормышын мин дә бик күпләр кебек үзешчән сәнгатьтән башладым. Бу фотода миңа 19-20 яшьләр. Яшь вакыт, матур вакыт. Сагындыра инде ул чаклар. Тик барыбер ир-атларны яшәлгән еллар белән маңгайдагы сырлар, кылган гамәлләр ныграк бизи».

«Артист баласының «ямьле балачагы» узган урын – сәхнә арты. Кызым Миләүшә дә сәхнә артында үсте. Артист тормышының барлык рәхәтләрен дә, михнәтләрен дә күрде. Шулай да үзе дә шул юлны сайлады. Бу фотога «Ике хуҗаның хезмәтчесе» спектакленнән соң төшкәнбез».

«Алты бала үстек без – өч кыз, өч малай. Хәзер андый ишле гаиләләр аз инде. Үстек, кеше булдык, туган оядан чыгып киттек. Шөкер, әти-әни йөзенә беребез дә кызыллык китермәдек. Бүгенге көндә барыбыз да исән-саулар. Бу фото күп еллар элек төшерелгән инде. Камил, ни сәбәпледер, фотога төшми калган.

«Кызым Миләүшә Камал театрында актриса. Бик матур рольләре бар. Эшенә яратып бара, яратып иҗат итә. Кызы Сөмбел тугач әйттем үзенә: «Кызым, балам бар, дип театрдагы бер эштән дә баш тартма. Театр үзенә җаны-тәне белән бирелгәннәрне генә ярата», – дидем. Кечкенә рольләрдән баш тартучылар, гаилә мәшәкатьләрен театр мәшәкатьләреннән өстен куючыларның урыны театрда түгел. Мин шулай дип уйлыйм. Беренче рәсемдә Миләүшә кызы Сөмбел белән, икенче фотода безнең тулы гаиләбез».

«Бу фотода без өч ир туган – Наил, Камил, Җәмил җәмәгатьләребез белән».

«17 ел диндә мин, биш вакыт намазны калдырмыйм. Бу фотога мәчет картлары белән «Казан нуры» мәчетендә төштек».

«Безгә – бертөркем иҗатчыларга Ходай хаҗ кылу мөмкинлеген бирде. Камал театры артистлары Айдар Хафиз, Идрис Мәсгутов, драматург Юныс Сафиулла, үзебезнең Тинчурин театрыннан Исламия һәм Хәлил Мәхмүтовлар белән хаҗда вакытта төшкән фото бу».

«Аллага шөкер, спектакльләребезне чит илләргә дә алып чыгарга мөмкинлекләр бар хәзер. «Гөлшаян» спектакле белән дә Төркиягә барып кайттык. Төрек тамашачысын күрдек, үзебезне күрсәттек».

Наил абый булганына шөкер итеп яши. Кешеләргә йөзе дә, күңеле дә ачык. Йөрәге якты, шул яктылык иҗат иткән образларына да күчә. Озын озак иҗат гомере телибез аңа. Матур хәбәрләр генә ишетеп яшәсен.