Татарстанда мөгезле эре терлекләрне ясалма орлыкландыру буенча 45нче Республика бәйгесе узды (ФОТО)

“Элита” дәүләт нәсел предприятиесе” АҖ базасында эре мөгезле терлекләрне ясалма орлыкландыру буенча операторларның 45нче республика конкурсы узды. Тантаналы ачылышта Татарстан Республикасы авыл хуҗалыгы һәм азык-төлек министры урынбасары Гелүс Баязитов, Биектау муниципаль районы башлыгы Равил Хисаметдинов, “Элита” дәүләт нәсел предприятиесе” АҖ генераль директоры Фәннур Зарипов катнашты.

Катнашучылар алдында сәламләү сүзе белән Татарстан Республикасы авыл хуҗалыгы һәм азык-төлек министры урынбасары Гелүс Баязитов чыгыш ясады.

“Эре мөгезле терлекләр үрчетү буенча технологлар арасында без даими рәвештә ярышлар үткәрәбез. Әлеге һөнәр бик мөһим, ул терлекчелекне үстерүдә драйвер”, - дип билгеләп үтте Гелүс Баязитов.

Әлеге бәйгедә республиканың 43 районыннан 69 белгеч катнашты. Арча муниципаль районының «Курса МТСы» ҖЧҖеннән Шакиров Ленар Сәфәргали улы эре мөгезле терлекләрне үрчетү буенча операторларның 45нче республика конкурсының абсолют чемпионы булды.

Мөгезле эре терлекләр үрчетү буенча иң яшь оператор номинациясендә беренче урынны Буа районының «Авангард» ҖЧҖеннән Марсель Әхмәтҗанов алды. 

Буа һәм Минзәлә техникумы студентлары арасында беренче урынны Минзәлә авыл хуҗалыгы техникумыннан Альмира Болонина алды. 

УЗИ аппаратын практикада кулланган өчен беренче урынны Арча районының «Курса МТСы» ҖЧҖеннән Ленар Шакировка бирделәр. Шәхси ярдәмче хуҗалыкларда ясалма орлыкландыру буенча беренчелекне Аксубай районыннан Рәис Хөснуллин алды.

Авыл хуҗалыгы оешмаларында мөгезле эре терлекләрне ректо-цервикаль ысулы белән ясалма орлыкландыру буенча Азнакай районының «Азнакай» агрофирмасыннан Илнур Төхбәтуллин җиңүче дип танылды.