«Үз гамәлләремнән үзем куркам»: өч кызны үтергән ир суд каршына басачак

Фаҗига 2021 елның 30 сентябрендә килеп чыккан. Иртән күршеләре ишегалдында бер яшь кызның мәетен, ә аннан соң беренче каттагы фатир эчендә тагын ике кешенең мәетенә тап булалар.

 

Тикшерүчеләр берничә тәүлек эчендә булган хәлнең бөтен картинасын ачыклый. Кич белән җирле көллияттә укучы өч студент кыз укудан кайтты. Алар Гайга күрше Башкортстаннан килгәннәр һәм монда фатир арендалап яшәгәннәр.

 

күптән түгел генә төрмәдән азат ителгән, хәзер җирле автомойкада эшләүче Лазарев, кызлар яшәгән фатирны күзәтә. Тәрәзәдән  өч кызның ашханәдәге өстәл артында утыруларын күреп ала. Берничә сәгатьтән соң, барысы да йокыга талгач, аларның фатирына бәреп керә. Кызлар ишекне бикләргә онытканнар икән.

 

Үтерүче пычак белән коралланган була. Төрмәдә үткәргән тормышы аны төрле хәлләргә уяу булырга өйрәткән. Ул кызларның күршеләрен алдалый, янәсе, ачкычын онытып калдырган, тегеләре домофонны ачалар. Ишек төбендә пычак тоткан ир пәйда булгач, куркып калган кызлар өчәүләп идәнгә ята.

 

Лазарев башта берсен, аннары шунда ук икенче кызны мыскыл итә. Аннары өчесен дә үтерә. Тикшерү вакытында ул тыныч тавыш белән аларны ничек җәзалаганын сөйли. Җинаять эзләрен яшерер өчен, ул йорттагы әйберләрне яндырып, чыгып киткән. Бер кыз әле үлмәгән, качарга тырышкан була, ләкин Лазарев аны ишегалдында куып җитеп үтерә. Аннары кире фатирга кереп, корбаннары өстенә ут төртә. Шуннан соң җинаятьтә гаепләнүче качарга булган. 

Башта ул урманга киткән, аннары өенә йөгергән, әйберләрен җыйган. Канлы киемнәрне шәһәр читендәге бетон коега ташлаган. Аларны оперативниклар тапкан һәм генетик экспертиза нәтиҗәләре буенча, әйберләрдә корбаннарның каны булуына инанып, берничә сәгать эчендә җинаятьчене билгеләгәннәр. Лазаревны эзләүгә игълан иткәннәр. Ул вакытта җинаятьче Гайдан Орск шәһәренә киткән була. Анда ломбардка үзенең алтын әйберен тапшыра һәм бу акчага фатир арендалый.

 

Үтерүче Орскидагы танышлары янына бара, юлда урамда калдырылган, хуҗасыз машинаны күреп ала. Ачкычлары да шунда гына була. Лазарев машинаны урлап кача, ләкин юлда барганда аңа сигнал бирәләр һәм ул юл-транспорт һәлакәтенә юлыга. Якында гына кизү торган хокук сакчылары эзләнелүчене табалар. 

 

Тикшерү вакытында көчләүче үзен тыныч тота, барысын да тәфсилләп сөйли. Берничә ай элек ул Гайда хатын-кызны көчләгән булып чыга.

 

Сораштыруларда Лазарев үзенең балачагы, әнисе турында искә ала. Янәсе, аны караучы да, тәрбияләүче дә булмаган. Яшүсмер чагында ялгыз калган һәм бөтен дөньяга үпкә саклый. Бервакыт ул хәтта: «Мине тоткарлавыгыз өчен рәхмәт, мин үз-үземнән куркам», - дигән.

 

Прокуратура рәхимсез үтерүчегә гомерлек төрмә җәзасы таләп итә.

 

Фото: Оренбург өлкәсе буенча тикшерү комитеты