«Шәрык базары» фестивале Россия Президенты грантын откан

Ваһапов фонды уздыра торган «Шәрык базары» халыкара милли мәдәниятләр фестивале «Президентның мәдәни башлангычлар фонды»ның (Президентский фонд культурных инициатив) 14,2 миллион сум грантын откан.

«Шәрык базары» фестивале беренче тапкыр 2021 елда «Беренче Халыкара төрки халыклар эстрада фестивале» буларак узды.
Фондның рәсми сайтыннан күренгәнчә, бу чараны уздыруның гомуми бәясе – 35,1 миллион сум, калган сумманы (20,9 миллион) оештыручылар үз өстенә ала. Бәйгедә барлыгы 881 иҗади проект җиңгән, грантларның гомуми суммасы – 3 миллиард сум.

«Россия 24» каналы кайбер җиңүчеләрдән интервью алган. Анда «Шәрык базары» халыкара фестивален Россиядәге беренче интернациональ концерт дип атыйлар. «Шәрык базары» фестивален оештыручы, Ваһапов фонды җитәкчесе Рифат Фәттахов «Россия 24» каналына интервьюсында «Без бөтен дөньяга үзебез өчен иң кадерле әйберне – Россиянең бөек мәдәниятен күрсәтергә тиеш», - ди.

«Без узган ел Шәрык базары фестивален халыкара төрки эстрада фестивале итеп уздырган идек. беренче тапкыр үткәрелүенә карамастан, шактый зур кызыксыну уятты. 11 илдән, 15 төбәктән җырчылар катнашты. Таҗикстан, Иран, Чечня, Дагыстан, Ингушетия башкаручылары бу фестивальдә катнашырга теләк белдерде», - диде Рифат Фәттахов «Татар-информ»га.

Былтыр фестиваль гала-концерт формасында узса, быел программаны 3-4-5 көнгә кадәр киңәйтергә, рәсми ачылыш, «Ялла» төркеме концерты, фәнни-гамәли конференция, гала-концерт формасында уздырырга уйлыйбыз, диде Рифат Фәттахов. Фестиваль октябрьнең соңгы атнасында булыр дип көтелә.

«Аның исеме дә «Шәрык базары». Шуны истә тотып, фестивальнең географиясен киңәйтергә булдык. Аны Халыкара милли мәдәниятләр фестивале итеп үткәрергә дигән фикергә килдек. Безнең бу тәкъдимне Татарстан Рәисе Рөстәм Миңнеханов хуплады. Аңа зур рәхмәт. Бу проект федараль дәрәҗәдә дә хуплау тапты», - диде ул.