10.03.2023 Мәдәният

Бүген Фәрдия Сәфәргалиеваның 70 яшьлек күркәм юбилее

Бүген – 10 мартта, Татарстанның атказанган сәнгать эшлеклесе Фәрдия Фәтхрахман кызы Сәфәргалиеваның туган көне! Аны гомер бәйрәме – 70 яшьлек күркәм юбилее белән ихластан котлыйбыз! Саулык-сәламәтлек, бәрәкәтле, озын гомер, гаилә бәхете телибез.

Фәрдия Фәтхрахман кызы режиссер, сценарист, алып баручы буларак, башта – 1992-1998 елларда «Казан Милли – мәдәни үзәге»ндә; 1998-2004 елларда – Габдулла Тукай исемендәге Татар дәүләт филармониясендә хезмәт куя, 2005-2011 елларда – Г. Кариев исемендәге Татар дәүләт яшь тамашачылар театрының әдәби-драматик бүлеге җитәкчесе, 2012 елда – Татарстан Язучылар берлегендә пропаганда бүлеге мөдире булып эшли.
Татар музыка сәнгатен пропагандалауга зур өлеш керткәне өчен ул 2002 елда ТР Мәдәният министрлыгының Мактау грамотасы белән бүләкләнә; Музыка сәнгатен үстерүдәге казанышлары өчен аңа 2003 елда Татарстанның атказанган сәнгать эшлеклесе дигән мактаулы исем бирелә.

Ул заманында Г.Тукай исемендәге Татар дәүләт филармониясенең әйдәп баручы коллективлары, танылган сәнгать осталары катнашында бик күп татар концертлары оештыра. Соңгы елларда үткәннәре дә хәтердә уелып кала торганнардан: Рабига Сибгатуллина белән Фәрит Хатыйповның 60 яшьлекләре уңаеннан «Җыр бәйрәме» дип исемләнгән юбилей кичәсе (2008 ел), Илһам Шакировның туган көненә багышланганнары (2013, 2014, 2018 елларда); Айрат Арслановны искә алу кичәсе (2013 ел); «Илһамият» клубының беренче кичәсе (2015 ел) һ.б..

Милли җанлы Фәрдия ханым үзенең хис-тойгыларын шигырь юлларына күчерә, җыр текстлары иҗат итә. Аның шигырьләре элек Ульяновскиның «Өмет» гәзитендә, соңрак «Казан утлары» һәм башка бик күп гәзит-җурналларда басыла. 2010 елда аның «Елларымны югалтма» исемле беренче шигырьләр китабы чыкты. 2022 елда аның шигырьләре Татарстан китап нәшрияты тарафыннан әзерләнгән «Яңа гасыр моңнары» дигән альманах-җыентыкта (төзүчеләре: Газинур Морат, Галимҗан Гыйльманов, Ленар Шәех) төрле буын авторларының әсәрләре белән дөнья күрде.

Ул бүгенге көндә дә иҗаттан аерылмый, һаман да сценарийләр, шигырьләр яза, аларны һәм байтак шагыйрьләрнең шигырьләрен яттан сөйли. Кичәләрендә катнашкан артистларның чыгышларын, анда яңгыраган җырларны, шигырьләрне тирәннәнрәк ачып бирү максатыннан, тамашачыларны сокландырган сәхнә бизәлешләренең – искитмәле видеорәтләрнең режиссеры да әле – Татарстанның атказанган сәнгать эшлеклесе Фәрдия Сәфәргалиева. Киләчәктә дә аңа иҗат дәрте белән илһамланып яшәргә язсын!