Тинчурин театры Тукай шигырьләреннән торган музыкаль композиция күрсәтә

Быел бөек шагыйребез Г.Тукайга 125 ел тулган көннәрдә безнең К.Тинчурин исемендәге Татар дәүләт драма һәм комедия театры зур әзерлек белән килә.

Әдипнең балаларга багышланган шигырьләреннән торган “Сөй гомерне” исеме астындагы музыкаль композицияне мәктәп балаларына һәм өлкән тамашачыларга күрсәтүне дәвам итә. Шунысы кызыклы, бер сәгать барган тамаша караучысын ялыктырмый, киресенчә, бер сулышта карала. Чөнки әсәрдә коры шигырьләр генә түгел, яшь артистларыбыз Илфак Хафизов, Резедә Сәлахова, Артем Пискунов, Лия Вилдановаларның зур сәхнә осталыгы белән рольләрен башкарулары, шул ук вакытта төрле музыка коралларында (пианино, курай, һ.б) уйнаулары да спектакльнең тәэсир итүен көчәйтә. Әсәрне сәхнәләштергән театрның баш режиссеры РФның атказанган артисты, ТРның атказанган сәнгать эшлеклесе Рәшит Заһидуллин музыка аркылы Г.Тукайның болай да күңелгә үтеп керә торган шигырьләрен артистларның уеннары аша дөрес итеп сәхнәләштерә алган. Балалар шушы илаһилыкка кереп китеп, әсәрне бер тында карыйлар. “Сөй гомерне” спектакле үсеп килүче буынга зур тәрбия чарасы да әле ул.