Гөлнара Тимерҗанова: "Ачуын чыгарсалар, тибеп очырырга мөмкин"

Куян елында туган татар эстрадасы артистлары нинди икән? Куян белән нинди охшашлыклары бар? 

 

Фәридә Әхмәтшина, Татарстанның атказанган артисты: “Мин – иҗади, эмоциональ кеше. Матурлык яратам. Миңа кемнәр туры килгәнен тәгаен әйтә алмыйм, иң мөһиме – әйбәт кеше булсын. Яңа ел – ул гаилә бәйрәме дип уйлыйм. Якыннарыма сюрпризлар, бүләкләр әзерләдем. Кешеләрне сөендерергә һәм үземне сөендергәннәрен яратам".

Гөлнара Тимерҗанова, Татарстанның атказанган артисты: “Куян - бик гади, йомшак, әмма ачуын чыгарсалар, түземлеге бетсә, аяклары белән тибеп очырырга да мөмкин (көлә). Куян дип үземне әйтүем. Мин - бик сабыр, гади, тиз аралашучан, горур. Минем өчен Яңа ел - яңа адым, нәтиҗә, яңа мөмкинлекләр һәм яңа өмет”.

 

Гүзәлия, автор-башкаручы: “Мин күбрәк куянга түгел, песига охшаган. Кешенең нәрсә елында туу мөһим түгел. Миңа әйбәт, тугры, ихлас, акыллы кешеләр туры килә. Яңа елны яшь вакыттагы кебек алай зур бәйрәмгә санамыйм. Минем өчен ул - ел ахыры, нәтиҗә ясау һәм киләсе елга планнар кору вакыты”.

Айгөл Нәбиуллина, Татарстанның атказанган мәдәният хезмәткәре: “Куян кебек үк ашыгыч, бөтен эшне берьюлы эшлим. Спортта да тиз темплы күнегүләр яратам. Куян кебек җиңел булырга тырышам. Яңа ел – тылсымлы бәйрәм. Күңел һаман нәрсәгәдер өметләнә бит ул. Кыш бабай белән Кар кызының юклыгын белсәк тә, Яңа ел уенчыклары, төрле-төрле утлар балачакка алып кайта, рәхәтлек бирә”. 

 

Илфак Хафизов, К.Тинчурин театры артисты: "Холкым белән Куянга охшамаган мин, чөнки ул - куркак. Мин күбрәк Песига охшаган. Песи кебек иркәләгәнне, сыйпаганны яратам, аның кебек мырылдап йөрим. Четерекле хәлләрдә песи кебек шома гына чыгып китәргә тырышам. Куянга Юлбарыслар туры килә, диләр. Чынлап та, миңа алар белән уңайлы һәм рәхәт. Әйләнә-тирәмдә Еланнар да күп. Ә хатыным - Аждаһа, аның белән дә без тулысынча туры киләбез".

Рината Тэй, җырчы: “Холкым буенча мин куян кебек назлы, тыныч. Миңа барлык елда туган кешеләр дә туры килә кебек. Яңа 2023 елга зур планнар, алдан сөйләргә яратмыйм, эшем белән күрсәтергә тырышам. Минем өчен Яңа ел - яңа хисләр, яңа адым, яңа ышаныч, яңа омтылыш!”

 

Мурат Гайсин, җырчы һәм композитор: “Карап торышка ябык күренсәм дә, чынлыкта, артык ачык күңелле, гади мин. Күзгә карап төтен җибәрә башласалар, чыгарымнан чыгам. Ә куян белән охшаш ягым – йомшак мин (көлә)”.

Ильяс Шәрипов, музыкант, баянчы: “Үзем турында сөйли алмыйм, дусларымнан яки дошманнардан сорагыз (көлә). 2023 елда иҗатта кайнарга, тагын да үз өстемдә эшләргә, гаилә корып, фатирга күченергә планлаштырам. Яңа ел – гаилә, дуслар белән җыела, узган елга нәтиҗәләр ясый торган көн”.