5 ел шәхси йортлар төзүче «Ханский дом» җитәкчесе Ильяс Гыймадов: «Сәбәбен без кылабыз – нәтиҗәсе Аллаһы Тәгаләдән»

«Авылны макта – шәһәрдә тор» дигән сүз бар. Бу гыйбарәне дәвам иттереп, “тагын да яхшырагы – шәһәр читендә үз йортың белән тор” дияргә була. Күпләр бүген шулай эшли дә. Әлеге вариант каланың да, саланың да өстен якларын берләштерә кебек. Индивидуаль торак йортлар, коттеджлар төзүче «Ханский дом» компаниясенең эшчәнлеген «Матбугат.ру»да даими яктыртып барабыз. Оешмага быел 5 ел тулды. Шул уңайдан аның җитәкчесе Ильяс Гыймадов белән сөйләштек.

– Ильяс Фәизович, шәһәр читендә үз йортың белән яшәү белән бәйле бик күп стереотиплар бар. Кайберләре стереотип та түгел сыман. Бүген бу өлкә кая бара?

– Әйе, күпләрдә шундый фикер бар: үз йортың белән торсаң, хуҗалык мәшәкатләреннән башың чыкмый, үлән чабасы, кар көрисе, кадак кагасы, бакча казыйсы бар дип куркалар. Бу күбрәк авылдан чыккан, андагы авырлыклардан туеп, шәһәргә китүчеләрнең фикередер инде. Ләкин замана үзгәрә, аның белән бергә трендлар да үзгәрә. Хәзер илдә “концептуаль бистәләр” дигән күренеш таралып килә.

– Нидән гыйбарәт ул?

– Казан янындагы бистәләрне генә алсак та, шәхси торак төзелешенең күләме зур, ләкин аның тәртибе юк иде. Кем ничек тели, ничек булдыра ала, шулай төзи. Халык өчен уңайлы мохит, спорт-балалар мәйданчыклары, инфраструктура булдыру, сервис төшенчәләре бөтенләй юк иде. Бүген бу өлкәгә башкача фикерли торган компанияләр килде. Без дә шундыйлардан. Мисал өчен, элек илебездә “хрущевкалар” төзеп куйдылар. Аларның бернәрсәсе дә юк иде. Ә хәзер аларга алмашка торак комплекслары барлыкка килде. Аларның заманча идарәче компанияләре бар. Подъездга килеп керәсең – хуш исле гөлләр үсеп утыра. Спорт мәйданчыклары, парковка, балалар өчен уңайлыклар бар.

Төркиядә, мәсәлән, беренче ике-өч катны фатир итеп сатмыйлар, ә халыкка кезмәт күрсәтү өчен файдаланалар: анда фитнес, сауна, бильярд, кинозал булырга мөмкин. Без дә шәхси секторда шуңа таба барабыз, йортлар төзүдән тыш уңайлы мохит булдырабыз. Казаннан ерак түгел «Ханская усадьба» дигән бистә төзелә. Идарәче компания оештырдык. Бүгенге көндә фитнес-үзәк, тренажер зал торгызылып килә. Шушы бистәдә яшәүчеләр өчен анда йөрү бушлай булачак. Чаңгылар сатып алдык, аларны файдаланган өчен түлисе түгел. Кеше йорт кына сатып алмый, ә хезмәтләр комплексын сатып ала. Концептуаль бистәләрдә йортлар бер стильдә, коймалары бертөрле. Башка бистәләргә күз салсаң, кемнеңдер коймасы юк, кемнекедер 3 метрлы, төрледән-төрле төстә. Күрше күршегә тиң булса, дус булса, яхшырак бит инде. 3 гектарда 150 төп алмагач утырта башладык. Өлкәннәргә, балаларга ял итү урыны да, балалар бакчасы, мәктәп, мәдрәсә дә булачак, ИншәАллаһ. Халыкара балаларны яклау көнендә балалар мәйданчыгы ачачакбыз. Шулай итеп, төп өч бурычны үтәргә: йорт төзергә, агач утыртырга, балалар үстерешергә дә булышабыз. Хәтта нянялар да булачак. Ата-аналарга бер-ике сәгатькә барып кайтасы була икән, балалары күз-караулы булачак.

 – Бу бистәдә кеше йортны үзе төзи алмаячак, сез төзеп бирәсез, димәк?

– Әйе, расланган биш-алты проект буенча төзибез. Өр-яңа проект әзерләп бирергә дә мөмкинбез. Әйтик, 6 сутый җирдә төзелгән йортлар 6-7 миллион сумнан 10 миллионга кадәр тора. “Чистовой отделка” ясап, өй җиһазларына, урындык-диваннарына кадәр урнаштырып бирә алабыз. Еш кына шулай була: кеше очсызгарак дип ипотекага йорт сатып ала, соңрак ремонт ясыйм дип уйлый, ә ипотеканы түләргә кирәк, балаларны укытырга кирәк – шулай итеп 10-20 ел буе ни ремонтын ясый алмый, ни рәхәтләнеп яши алмый. Шулай булмасын өчен, төрле вариантларны карап, бергәләп сайлыйбыз. Хәтерләсәгез, элек йортларны бергәләп, өмәләр ясап салалар иде. Башта фундамент, аннан коробкасын, аннан түшәмен-идәнен. Йорт төзеп керү 10-15 елга сузылырга мөмкин иде. Салып кергәнче, искереп бетә, дигәндәй. Бу тренд инде узды. Хәзер кеше, гадәттә, 100 квадрат метрлы бер катлы йорт сайлый. Шул ук 3 бүлмәле фатир, ләкин җирдә, ягъни мәсәлән. Августтан башлап бүгенге көндә «Ханская усадьба»да беренче урамда 25 йорт төзелгән. Икенче урамны төзи башладык. Максатыбыз язга кадәр төзеп бетерү.

– Казаннан ерак урнашканмы ул?

– Казан чигеннән 15-20 чакрым чамасы. Раифадан ерак түгел. Бик матур урында – Идел-Кама тыюлыгы янында, табигате искиткеч матур. Һавасы саф, үз күле бар. Тыныч, парковкасы бар, телисең икән, гараж төзергә мөмкин. Монда вакыт та башкача ага. Җиргә якынаясың. Күңел ял итә.

– Башка бистәләрдә дә заказ буенча йорт төзү эшен дәвам иттерәсезме?

– Төзибез. “Сарафан радиосы” аша ишетеп-белеп киләләр. Быел «Урбан-Медиа» порталында «Казанда иң яхшы шәхси торак төзүче» номинациясендә беренче урынны яуладык. Оешмабызның биш еллыгына шундый бүләк булды. Аллага шөкер, командабыз өчен бу зур вакыйга. Якын киләчәктә төрле бистәләрдә йортлар төзү эшеннән баш тартырга җыенмыйбыз. Ләкин бүген күбрәк «Ханская усадьба» белән янып йөрим, ул миңа балам шикелле. Теләгебез – Россиянең иң яхшы бистәләре исемлегенә керү.

– Берьюлы ничә төзелеш алып барасыз?

– Бүгенге көндә параллель рәвештә «Ханская усадьба»да 35 объект төзелә. Кайдадыр фундамент казу, кайдадыр ясалып бетү дәрәҗәсендә. Барысы да бездән генә дә тормый. Мисал өчен, ут сузу, газ тоташтыру кебек хезмәтләрне без үзебез генә башкарып чыга алмыйбыз. Ләкин куелган срокларга сыешырбыз, дип ышанам.

– Кыш көне йорт төзергә ярамый дигән сүз дә бар бит.

– Уйдырма ул. Әле фундамент салганнан соң бер ел басылырга тиеш дигән уйдырма да бар. Мин бу хакта болай дип шаяртам: әгәр дә кыш көне йорт салырга ярамаса, Казанның яртысы да төзелеп бетмәгән булыр иде. Андый стереотиплар бетте бугай инде ул хәзер. Технологияләрне белеп, дөрес куллансаң, бар да яхшы булачак. Без бу теманы экспертлар чакырып та аңлаттык, бихисап видеороликлар да төшердек инде, хәзер кешедә дә андый сораулар тумый кебек. Төзибез, эшлибез, бернинди проблема юк.

– Кеше табигате буенча скептик. Ышанмаучанлык көчле. Һәм бу аңлашыла торган хис. «Ханская усадьба» – ачык кырда башланган эш. Сезгә иң беренчеләрдән булып ышанып килгән кешеләр кемнәр алар?

– Яхшы танышларым бик ярдәм итте. Шәхси бренд, репутация дигән төшенчәләр дә зур роль уйный. Ә иң мөһиме – бу проектка иң беренчеләрдән мин үзем ышандым. Җаным-тәнем белән янып йөрим. Авыл төзү, тарихта үз эземне калдыру – минем күптәнге хыялым. Беренче клиентларым ватсап аша сорашып килгән кешеләр булды. Аларның йортлары төзелеп бетеп килә. Ышанганнары өчен мин аларга бүген дә рәхмәтле. Булды шундый вакытлар: риелторлар белән төркемләп карарга килүчеләр: “Юк, бу килеп чыкмас”, диделәр. Бәлки бүген дә шулай уйлаучылар бардыр. Динамиканы күргәч, киресенә инанасың: йортлар төзелә, асфальт салына, тротуарлар җәелә. Безнең девиз: “Сүздән – эшкә!”. Сөйләдең икән, эшләргә кирәк. Шуңа күрә без һәр сөйләгән сүзне үлчәп сөйләргә тырышабыз һәм реаль эш белән җөпләп барабыз.

– Гомумән, Казаннан читтә йортларны кемнәр ала? Аларның портреты нинди?

– Нигездә, балалы гаиләләр. Беренчедән, даими тору урынын булдыручылар, шулай ук фатирда яшәп бирегә ял итәргә килүчеләр. Ялларда, каникулларда яшәргә кайтучылар. Башка шәһәрдән күчеп килүчеләр дә байтак. Түбән Кама, Мәскәү, Нижневартовск кебек шәһәрләреннән күченәләр. Күбесе эшмәкәрләр.

– Сезнең күп кенә социаль проектларыгыз да бар. Хәйриячелек, балаларга ярдәм итү, мәчетләр төзү белән дә шөгыльләнәсез. Компания өчен ни дәрәҗәдә мөһим бу?

– Безнең команда өчен бу иң мөһим эшләрнең берсе. Бу бизнес түгел. Акча эшлим дип кенә озак эшләп булмый – идея, кыйммәтләр кирәк. Бездән күреп башкалар, аеруча яшьләр тартылыр дигән өмет бар. Җәмгыятькә, социаль яктан якланмаган кешеләргә ярдәм итү – игелекле гамәл. Син дөньяга нидер бирсәң, дөнья да сиңа нидер кайтара, дигән фикер белән эш итәбез.

 – Ничә мәчет төзедегез?

– Казанда “Рәхмәтулла” мәчете, Богородское бистәсендә, Яңа Шигалида төзедек. Сечин урамындагы мәчет төзелешенә дә бераз өлешебез керде. Хәзерге вакытта Мирный бистәсендә бер мәчет төзеп киләбез. Беренче май бистәсендә дә төзи башладык. “Беренче май” исемле булгач, беренче майларга тапшырырбыз дип ният бар. Төзүчеләрдә объектны аерым бер срокларга тапшыру – проблемалы хәл. Без, гадәттә, һәр эшне ниндидер көннәргә билгеләп тапшырабыз. Бер мәчетне Корбан гаетенә, икенчесен Уразага дип ачтык. “Дом доброты” проекты дәвам итә. Шушы көннәрдә Мирный бистәсендә янган гаиләгә ярдәм итәргә исәплибез. Әтиләре инвалид, әниләре мәктәптә эшли, ике балалары бар. Бергәләп ярдәм итәрбез, дип ышанам. 

– Әлерәк телгә алынган “шәхси бренд” дигән нәрсә бизнеста никадәр дәрәҗәдә кирәк?

– Заманасы шундый. Элек, әйтик, ООО дәрәҗәле санала иде. Шәхси эшмәкәрләрне “чпшник” дип кимсетебрәк карыйлар иде. Бүген ОООларны әллә ничәне ачарга була, офис та, хезмәткәр дә кирәкми. Бүген кеше әйберне кешедән сатып ала. Конкрет кешедән. Шәхси брендны үстерү шуңа да бик мөһим. Кеше никадәр ачык булса, аның белән эшләве дә җиңел, ышанычлы.

– Шушы шәхси брендны куәтләп, бизнеска багышланган китап та язасыз икән. Татар телендә мондый китапның чыкканы юк иде бугай.

– Теләгем кешеләргә ниндидер файда китерү, үземнән соң эз калдыру. Мотивацион, автобиографик китап бу. Балалар өчен мәктәптән үк укып өйрәнергә әсбап булырлык. Бизнес һәм кыйммәтләр, игелеклелек турында яхшы киңәшләр. Аллаһ боерса, 2023 елда татар һәм рус телендә чыгар, дип ышанам.

– Инде 5 ел узып киткән. Алга таба компаниядән тагын нинди яңалыклар көтәргә?

– Үз эшеңне яратып, күңелеңне биреп эшләсәң генә, эш уңышлы була. Бер карасаң, биш ел күп тә кебек, юк та кебек. Командабыз алдында бик зур максатлар тора. Планнарыбыз зурдан. Сәбәбен без кылабыз – нәтиҗәсе Аллаһы Тәгаләдән.

Әңгәмәдәш – Данил Сәфәров.
_{Реклама. “Ханский дом”}