Иреңне бүлешеп яшәү

Кызым белән елга портында һава сулап йөрибез. Кинәт баласын эт итеп сүккән, бар көченә кычкырган тавышка туктап калдык. Карасак, бер хатын 4-5 яшьләр тирәсендәге кызын җыелып торган суга кергәне өчен орыша икән. «Ник син мине тыңламыйсың, Алла бәндәсе, киемнәреңне юа-юа гаҗиз булам бит. Ник барыгыз да миңа каршы соң сез, күпмегә кадәр мине газапларсыз?!»

Хатын бар ачуын кызыннан ала иде булса кирәк. Югыйсә суга керүе белән генә баласы аны газапларга салмый бит инде? Баласы куркып елый башлагач, йомшак тавыш белән, кызыма күрсәтеп: «Әнә нинди акыллы кыз, еламый да, аны усал бабай да алып китми», – дип юатырга тотынды. Минем гаҗәпләнеп карап торганымны күргәч: «Үләм бит инде бу бала белән, бигрәк шук, моның кадәр әтисенә охшар икән! Ата тәрбиясе булмагач, тыеп та булмый», – дип сүз башлады ул. Баксаң, яңа танышым Алинәне ире ташлап киткән икән. Аксубай районыннан, Казанда бер туганы да булмаган әңгәмәдәшем күңелендәгесен сөйләп бирде.

Алинә иреннән 7 яшькә олырак. Алар икесе дә бер авылдан. Тату гына яшәп ятканда, көзгә таба кинәт ире эштән соңга калып кайта башлаган. Йә аның машинасы юлда ватыла, йә ул эшендә тоткарлана, имеш. Ярты еллап шулай дәвам иткәннән соң, Яңа ел алдыннан ул бөтенләй өйгә кайтмаган. Нишләргә дә белмәгәч, Алинә иренең эшенә шалтыратып караган. Анда исә: «Ирең кайтып киткәнгә биш былтыр, бүген кыска эш көне иде», – дип җавап биргәннәр. Төне буе керфеккә керфек какмый, Алинә ирен көтсә дә, тегесе шалтыратып та карамаган, телефоны «не доступен». Инде икенче көнне милициягә хәбәр итимме дигәндә, Алинәгә дус кызы, шалтыратып: «Иреңне кибеттә бер яшь кыз белән күрдем», – димәсенме? Моңа кадәр иренең хыянәт итәргә сәләтле икәнен башына да китермәгән хатынның күңеленә шик кергән. Ул ирен күзәтергә булган. «Гел телефонын карый башладым, кичләрен эшенә бара идем, берсендә артыннан машина яллап бардым. Ирем Җиңү проспектындагы бер йортка кереп китте, чыкканын көттем, көттем, юк. Шалтыраттым, ул исә: «Эштә тоткарланам әле», – дип хәйләләде. Шул чакта хыянәт иткәнен аңладым, – диде ул. Алинә әлеге вакыйгадан соң: – Төне буе елап чыктым, бала да күзгә күренмәде, эчеп исерәсем, бу дөньяда барысын да онытасым килде», – дип искә ала. Бер атна томан эчендә кебек йөргәч, ул иренә барысын да сөйләргә була. Ни хикмәт, ире яшерми: «Син мине канәгатьләндермисең, – дип кенә җавап бирә. – Ләкин хатын буларак мин сине хөрмәт итәм, баламны да ташламыйм, сөяркәм янына да йөриячәкмен», – дип тә өсти ул. Көтелмәгән бу җаваптан Алинә өнсез кала. «Нишлим соң, минем кайсы җирем ким ул хатыннан?» – дип еларга тотына. «Шул вакыйгадан соң ирем эротик кинолар алып кайта башлады, имеш, миңа мәхәббәт уенын өйрәтә, шуларны булдыра алсаң, беркая да йөрмим, дигән була. Ләкин ул видеоларны карагач, мин укшый ук башладым», – ди Алинә.

Озак сөйләштек без аның белән, ул иреннән аерылам дигән фикергә килеп, кызын кичке сменага эшенә ияртеп китте.

Ярты еллап вакыт узгач, Алинәне кабат очраттым. Бу юлы аны танымый тордым хәтта. Шиңгән чәчәкне хәтерләткән, озын, иске фасондагы курткалары белән күңелемә кереп калган хатын шундый матурланган, заманча киенеп җибәргән, чәчләрен кистергән, яшәреп киткән. Кызы да курчак кебек. Кызыксынуымны җиңә алмыйча, ире турында сорадым. «Әй, нәрсәләр булып беткәнен белмисең шул әле син, мин аның себеркесе белән очраштым, ник кеше гаиләсен җимерәсең, дип аңлатып та карадым. Ул бала-чага гына икән әле. 18 яшьлек бер урам себеркесе шунда. Мин аны яратам, дигән була. Ә ирем хәзер күбрәк өйдә булырга тырыша. Дөрес, себеркесе янына да барып килә инде. Ләкин хәзер төгәл беләм: барыбер үз гаиләсе янында рәхәтрәк аңа. Теге каһәре балага гына уза күрмәсен», – ди. Алинә, журналист икәнемне белгәч: «Исемнәремне үзгәртеп газетагызга язарсың әле, бу вакыйгалар миңа күп нәрсәне аңларга ярдәм итте. Башкаларга да сабак булыр, – дип, киңәшләрен дә әйтте. – Иреңне яныңда тотасың килсә, аның өчен сөяркә дә, хатын да, дус та була белергә кирәк. Беркайчан да ирең янында ертык халаттан, чәчеңне тарамыйча, ямьсез кыяфәттә күренмә. Алар уңган, булганга түгел, нәкъ менә чибәр, сексуаль хатыннарга карыйлар икән шул. Машина алырга ашыкмагыз. Яшь ир-атны автомобиль боза. Кызлар ирләрнең байлыгына кызыга бит хәзер. Аннары хыянәт авыр булса да, кичерә белергә кирәк икән аны. Ирләр аз, хәзерге заманда ялгыз гына бала үстерүләре ай-һай. Артык горур булудан файда юк», – диде ул.

Алинә бик шат кебек күренде миңа. Иренең сөяркәсе булуына да исе китми сыман. Мин исә уйланып калдым: ирләр аз, тормыш авыр диеп, иреңне чит-ятлар белән бүлешеп яшәүгә күз йомып буламы икән? Алла сакласын...