Казанда элмә такталарда иң күп хата табучыларны бүләкләделәр (ФОТО)

Татарстан Республикасы Дәүләт Советында Татар телендәге элмә такталарда, мәгълүмат такталарында, топографик билгеләрдә, юл күрсәткечләрендә һәм торак йортлар аншлагларындагы исемнәр һәм язуларда хаталарны ачыклауга Татарстанда яшәүчеләрне җәлеп итү буенча бәйге җиңүчеләрен котладылар.

Бәйге Татарстан Республикасы Президенты каршындагы Татар телен һәм Татарстан Республикасында яшәүче халыклар вәкилләренең туган телләрен саклау, үстерү мәсьәләләре комиссиясе тәкъдиме белән агымдагы елның 1 февраленнән 1 сентябренә кадәр «Халык контроле» дәүләт мәгълүмат системасы платформасында узды.

Төп оештыручы – Татарстан Республикасында кеше хокуклары буенча вәкаләтле вәкил. Бәйгенең модераторы – Татарстан Республикасы Фәннәр академиясенең Г.Ибраһимов исемендәге Тел, әдәбият һәм сәнгать институты.

«Халык контроле» дәүләт мәгълүмат системасы платформасында «Исемнәрдә һәм язуларда хаталар» категориясе буенча барлыгы 6 663 гариза кабул ителде.

Бәйге нәтиҗәләре буенча «Халык контроле» системасында иң күп гариза калдырган 9 җиңүче билгеләнде: Хөснетдинов Тәлгат (Мәскәү), Вафин Шамил, Әхмәтҗанов Булат (Чистай), Әхмәтов Ярослав, Газизуллина Айгөл, Косолапова Лилия (Казан), Хәйруллина Айгөл, Хәйруллин Ирек, Гатауллина Гөлназ (Яр Чаллы).