12.08.2022 Җәмгыять

“Наҗия апа безне бик күп эшкә өйрәтте”

Баулы районы Яңа Шалты авылында яшәүче укытучы-ветеран Наҗия Гыйльфанова төрледән-төрле мавыктыргыч чаралар, кичәләр, очрашулар һәм осталык дәресләре үткәреп тора. Шушы көннәрдә ул укучы балаларның җәйге каникулларының бер көнен кызыклы да, файдалы да итте. Алар бергәләп мунча өчен каеннан пиннек (себерке) әзерләделәр.

— Укучыларның җәйге ялының һәр мизгелен күңелле, файдалы, имин итеп уздыру, оештыра белү — өлкәннәрнең бурычы, — ди Наҗия апа. — Безнең авылга да шәһәрдән әби-бабайларына, туганнарына бик күп бала кайта. Нишләп әле алар белән күңелле очрашулар уздырмаска!

Наҗия Гыйльфанова сөйләвенчә, бу юлы балалар белән очрашу аларның ишегалдында оештырылган. Алдагы көнне мунча пиннеге бәйләү өчен кирәк-яракның барысын да тормыш иптәше Илшат агай белән бергә әзерләп куйган ул.

— Балаларга башта мунча сихәте, парлану, чабынуның файдасы хакында сөйләдем, — ди Наҗия ханым. — Мунча пиннеген җыю вакыты, төрләре турында сөйләшеп, пиннек бәйләдек. Балалар бик мавыгып безгә кушылдылар. Ярыша-ярыша пиннек бәйләдек. Арасына мәтрүшкә, ылыслы ботаклар, имән ботагы һәм башка үләннәр кыстырдык.

— Безне кечкенәдән мунчада чабынырга, парланырга әбием өйрәтте, — ди V сыйныфка баручы Камилә Сәлимгәрәева. — Чабынырга яратам, әмма мунча пиннеге бәйләгәнем юк иде әле. Кызык икән! Мин үземә берничә кечкенәне әзерләдем. Әниемә күрсәтеп, шаккатырам әле. Алайса, миңа гел зур пиннек бирәләр. Кечкенәсе уңайлырак булачак.

— Наҗия апа безне бик күп эшкә өйрәтте. Җәйге каникулларны шуңа да көтеп алабыз. Алъяпкыч тегәргә, калфак ясап, аны чигәргә, бәйләргә дә өйрәтте, — ди Алиана Хәйруллина. — Узган атнада, барыбызны да җыеп, җиләккә алып барды. Төрле шифалы үләннәрне куллана белергә өйрәтте. Шундый мавыктыргыч булды! Болын чәчәкләреннән такыялар үреп кидек.

Осталык дәресе барышында Наҗия апаның тормыш иптәше Илшат агай белән күрше кунак малае Ранил кызларга авыррак булып тоелган эшләрдә ярдәм иткәннәр. Пиннекләрнең сапларын җайлап, балта белән тигезләп биргәннәр.

— Балаларга барысы да ошады, тик менә кычыткан пиннеге бәйләү генә аларны бераз гаҗәпкә калдырды, — ди Наҗия Гыйльфанова. — Шуннан соң киләсе очрашуда кычыткан хакында сөйләшербез дип уйлап куйдым. Кычыткан ашы, төнәтмәсе, аның дәвалау үзлекләре турында сөйләп бетерерлек түгел бит.

Пиннек әзерләү буенча файдалы сәгать бергәләп шифалы үләннәрдән ясалган чәй, өчпочмак, тәбикмәк һәм кыстыбый белән чәй эчеп тәмамланган.

Индира СӘЙФУЛЛИНА
Ирек мәйданы
№ --- | 12.08.2022