"Де-валяй" кәтлите

"Де-валяй" кәтлите - француз ризыгы. Совет заманында каһәр суккан капиталистларга бәйле һәрнәрсә телгә алынырга тиеш булмаганлыктан, аңа "котлета по-киевски" дип исем такканнар. Вакыт узган саен затлы ризык саналган "Де-валяй" кәтлите әллә нинди формаларга кереп бетте. Интертат укучыларын классик рецепт белән таныштырмакчы булам. Күптән түгел, миңа чын "Де-валяй" кәтлитен ашап карау бәхете тиде.

Егерме еллап элек булды бу хәл. Гел онытасы түгел: соңга калган очкычны аэропортта көтеп утырабыз. Кечкенә кызым тәмам ачыккач, кафега кердек. Кызый шундук иң зур кәтлитне сорап алды. Бәя кәгазендә "Котлета по-киевски" дип язылган иде. Элегрәк ишеткәнем бар иде. Мондый исем белән эченә нидер салынган, тыштан гына ит белән капланган кәтлитләрне атаганнарын. Кызыма башка әйбер алыйк дип әйтеп тә карыйм, юк, шул гына кирәк. Инде утырып ашый башлагач, чыннан да, фарш эчендә пешкән йомырка булуы ачыкланды.

Дөрес итеп әзерләнгән "Де-валяй", яки "котлета по-киевски" өчен тавык түшендәге ак ит кирәк, Бер тавыктан ике кәтлит чыга. Ак итне аерып алганда бер буын канат сөяге калырга тиеш, шунысы мөһим - зур һәм кечкенә филе кисәкләре арасындагы сеңер тартып алына. Ит йомшак кына тапала.

Эченә 20 граммлы май кисәге салып ит конверт итеп төрелә, онда, соңыннан йомыркада әвәләнә. Алдан ак ипинең (француз булкасы, совет заманында аны "городская" дип атыйлар иде) йомшагы вак итеп турала. Онда һәм йомыркада әвәләнгән итне әйбәтләп шул туралган ипи белән "тышлыйбыз".

Шулай итеп әзерләнгән ит төргәген сыек май мул итеп салынган казанда, яки тирән табада кыздырабыз, соңыннан мичтә бераз кызартып алабыз. Әзер кәтлитне алдан әзерләп куелган ак ипи йомшагыннан уеп ясалган һәм майда кызартып алынган "терәк"ләргә куябыз. Канат сөягенә салфеткадан ясалган папильотка кигезәбез. Гарниры - җаныгыз ни тели, шуны куярга мөмкин.

Булды!

Ашыгыз тәмле булсын!