Мәет юган суны унитазга түгәргә ярыймы?

— Мәет юуның шәригатьтәге хөкеме фарыз кифая. Ягъни әгәр мөселманнар арасыннан бер кеше бу эшне башкарса, башкалар өстеннән ул вазыйфа төшә. Бу гамәл фарыз гамәлне үтәү белән бәйле булганга, аның савабы бик зур. Мөхәммәд (с.г.в.): “Кем дә кем мәетне юса һәм аның кимчелекләрен яшерсә, аның кырык тапкыр гөнаһлары гафу ителә. Кем дә кем мәетне кәфенләсә, Аллаһы Тәгалә аңа җәннәттә ефәк кием кидерә. Кем дә кем мәеткә кабер казыса һәм аны шунда җирләсә, аңа байның мохтаҗ кешегә кыямәт көненә хәтле яшәү урыны биреп торган кебек әҗер-савабы була”, — диде (Хәкимнең “Мүстәдрак” хәдисләр җыентыгыннан).

 

— Кайберәүләр бу эшне мәетне юучы кешедән карап торып, сораштырып, ә кемдер мәчет-мәдрәсәдә укып өйрәнә. Мәет юар өчен махсус рөхсәт кәгазе таләп ителми. Иң мөһиме — мәетне юучы шушы эшне шәригать кушканча башкарырга һәм сер саклаучы, гайбәт сөйләмәүче ышанычлы кеше булырга тиеш. Гадәттә, авыл җирендә мәет юарга берничә кеше йөри. Авыл халкы аларның кайсы ышанычлы икәнен яхшы белә һәм мәет юарга шуны чакыра.

— 2010 елдан үзебезнең мәчеттә имам-хатыйб вазыйфасын башкарам. Кешеләр сорап килгәндә, мәет юарга да баргалыйм, ләкин күп очракта бу эшне шуның белән һәрдаим шөгыльләнүчеләргә тапшырам. Юган мәетләрнең төшкә кергәне, аларны күреп саташканым юк. Бу гамәлне башкарудан курыкмыйм. Хәзерге вакытта кайбер мәчетләрдә мәетләрне юа торган махсус урыннар бар. Мәсәлән, “Казан нуры”, “Гадел”, “Тынычлык”, Лаеш районының Усад авылындагы “Ихлас” мәчетләрендә мәетханәләр эшли. Шул мәчетләргә мөрәҗәгать итеп, бу эшне башкарырга була.

 

— Мәетне юа башлаганда укыла торган аерым дога юк. “Бисмилләһ” (“Аллаһ исеме белән эшемне башлыйм”) дип әйтсәң, шул җитә. Тәһарәт һәм госел алганда һәм мәетне юа башлаганда, бу сүзне әйтү сөннәт гамәл булып тора.

 

— Шәригатьтә чишмәдән су алып кайтканда сөйләшергә ярамый дигән тыю юк. Бу күбрәк шул якларда кабул ителгән гореф-гадәт белән бәйледер. Суны алып кайтканда чиләкне каплау да мәҗбүри түгел. Иң мөһиме — суга бәвел һәм тизәк шикелле нәҗесләр төшмәскә тиеш. Бу максаттан томаласаң гына. Хәзер авыл җирендә дә су өйгә кергән. Мәет юар өчен суны краннан агызып алырга рөхсәт ителә. Чишмәдән алып кайтсаң, краннан агызсаң да, суны “бисмилләһ” әйтеп тутырырга кирәк. Су чиста һәм кулны туңдырмый торган температурада булырга тиеш.

— Кайбер сихерчеләр һәм бозым ясаучылар мәет суы яки мәетне юганда кулланылган чүпрәкләр, сабыннар белән сихер ясарга мөмкин. Бу әйберләр начар ниятлеләр кулына төшмәсен өчен, мәетне юганда ышанычлы кешеләр катнашырга тиеш. Шуңа күрә мәетне юганда һәм су ташыганда туганнар, якыннар катнашса яхшы. Бу гамәл туганлык хакын үтәү булып та тора.

 

— Шәригать күзлегеннән, бу су башкаларга зыян китерми. Әлеге урынга бассаң, аяк сызлый, авырый башлыйсың, дигән сүзләр — ырым гына. Ислам динендә аның нигезе юк.

— Мәет юган су тере кеше госел яки тәһарәт алганда тәннән агып төшкән су шикелле. Икенче төрле ул “кулланылган су” дип атала. Шуңа күрә аны канализация чокырына түгү рөхсәт ителә. Күп очракта шәһәр җирендә мәет суын унитазга түгәләр. Моның гөнаһы юк.

— Әгәр бер кеше үзен юарга баласына васыять итеп калдырса, аны булдыра алган очракта үтәргә кирәк. Баласы бу эшне белмәсә яки башкарудан курыкса, юа белә торган башка кешегә әйтә. Моның өчен аңа гөнаһ булмый.

Фото: пиксабай