|
|
Бүген кемнәр туган
|
|
Архив
|
28.03.2022 Җәмгыять
Роберт Миңнуллинның кызы Таңсылу: «Соңгы көннәре, соңгы төне — һәр мизгеле күз алдында…»Кичә 27 март көнне халык шагыйре Роберт абый Миңнуллинның вафат булган көне иде. Роберт абыйның кызы Таңсылу әтисе истәлегенә аның сүзләренә иҗат ителгән «Каен суы» җырын яздырган. Бу хакта ул үзенең телеграм-каналында хәбәр итә. «Өченче ел рәттән яз башы иң авыр ел фасылы… Соңгы көннәре, соңгы төне — һәр мизгеле күз алдында…
Зөһрә апа Сәхабиева башкаруында бу җырны без әти белән бик еш тыңлый идек. Машинада барганда әтинең җырлар дискын кабызуга 13нче җырдан башлый идек. «Гениаль сүзләргә язылган гениаль җыр бу!» дия идем мин әтигә. Кушылып җырлап барам үзем. Әти, гадәттә, дәшми генә кырый тәрәзәгә карап тыңлый иде. Күңеле шундук тулган инде… «Син әйбәт җырлар идең бу җырны, кызым» диде берсендә әти тәрәзәдән күзен алмыйча…
Әтидән соң бу җырны бер еллап бөтенләй тыңлый алмадым.
Тәрәзәгә төбәлеп тыңлап баруы күз алдыма килеп баса да, күз яшьләренә буылам.
Ничаклы гына вакыт узса да, күңел тула һәм тулачак, моны кабул итәргә кирәк. Тулсын гына, минем әти белән аралар гына өзелмәсен!
Нәтиҗәсен сезнең хөкемгә дә тәкъдим итәм.
Биредә булганыгыз, терәк булганыгыз өчен рәхмәт сезгә», — дип уртаклаша Таңсылу.
--- |
Иң күп укылган
|