«Кроль? Брасс? Юк! Колач җәеп йөзү!» («Фәйзуллин йөзүләре»ннән ФОТОрепортаж)

Башта кунакларга тәмле итеп иртәнге аш ашаттылар. Аннары Шәйхи Маннур һәйкәле янында шигъри бәйрәм булды. Анда Мамадышта яшәүче язучылар, иҗат әһелләре, китапханәчеләр, укытучылар, әдәбият сөючеләр килгән иде. Казан кунакларын сәламләргә район башлыгы Анатолий Иванов та килде. Шигъри мизгелләрне Алмаз Хәмзинның җырлы-баянлы чыгышлары бизәде. Бер апаның каршысына утырып, шул кадәр матур итеп җырлады ки, “бу вакытта Шәйхи Маннур борылып карады бугай”, - диде Зиннур Мансуров. Сүз уңаеннан, Зиннур әфәнде быел «Фәйзуллин йөзүләре»н оештыручыларның берсе иде, чөнки үзе дә Мамадыш районыннан.

 

Шигъри бәйрәмнән соң кунакларны музейга дәштеләр. Монда район белән бәйле тарихи экспонатлар белән таныштык. Һәм киттек шуннан соң Нократ буена. Йөзү ярышына. Монда инде МЧС хезмәткәрләре, дежур торучы “Ашыгыч ярдәм” машинасы, оештыручылар җыелган иде. Кайберәүләр су коенды, кемнәрдер ярышка ук керде. Нократның агымы көчле шуңа күрә йөзүне югарырак җирдән башладылар. Башта Нократның икенче ярына йөзеп чыгасы, аннары кирегә. Кайберәүләрне елга уртасыннан МЧС көймәсе тартып алды. Көлке хәл түгел, Нократның уртасына җитү дә зур батырлык. Йөзүчеләрне көткән арада ярдагы халыкның күңелен Алмаз Хәмзин күрде.

 

- Алмаз абый, бу йөзү стиле ничек дип атала? Кроль? Брасс?

- Колач җәеп йөзү дип атала.

 

- Алмаз абый, тегендә кемнәр йөзә икән, башлары буенча танымыйсызмы?

- Хәзер кешене баш буенча танып булмый, башсызлык буенча гына танып була.

 

- Алмаз абый, Равил Фәйзуллин иҗатын ничек бәялисез?

- Элегрәк аның иҗаты агымга каршы иде. Аннары агым көчәйде.

 

Алмаз Хәмзинның борычлы төрттерүләре ни белән тәмамланыр иде, белмим, әмма беренче булып йөзеп килүченең башы һәм ике кулы күренде. Ярдагы халык шул якка чапты. Әмма бу Мамадышта яшәүче бер кеше икән, татар да түгел. Бер уйласаң, йөзү ярышында иң беренче булып ул килде, әмма иҗат әһеле булмагач, аның белән бик кызыксынучы булмады, фотога да бик төшермәделәр. Барысы да офыкка карап, Равил абыйны көтте. Һәм ул үзен озак көттермәде. Әәәнә матур гына итеп өч кеше йөзә. Равил Фәйзуллин, аның улы Газиз һәм Данил Гыйниятов. Бу кешеләрнең финишка бергә килүләре инде традициягә әйләнде бугай. Элек Илсөяр Ихсанова да алар белән беррәттә иде, әмма ул быел йөзмәде. “Башка хатын-кызлар арасыннан иптәш булмагач, кермәдем инде”, - диде ул “Матбугат.ру” хәбәрчесенә.

 

Бөтен халык яр буена чапты. Җиңүчеләрне котладылар. Шундый гадәти булмаган ярыш бу, чөнки монда бөтен кеше җиңүче. Киләсе елга 44нче «Фәйзуллин йөзүләре»ндә катнашырга насыйп булсын. Елгаларыбыз саекмасын, Аллаһы Тәгалә сәламәтлектән аермасын.

 

Бәйрәмнән «Матбугат.ру» фоторепортажы: