12.05.2021 Җәмгыять

Кемнәргә бушлай газ кертерләр?

Беркемгә дә сер түгел, газ кертү чыгымнарын ерып чыгу һәрбер гаиләнең дә кулыннан килә торган эш түгел. Гражданнарны “зәңгәр ягулык”лы итү максатыннан ил җитәкчелеге төрле чаралар күрә.

Соңгыларыннан - 2 майда Русия Президенты Владимир Путин Федераль Җыелышка юллама нәтиҗәләре буенча йөкләмәләр исемлеген имзалады. Шулар арасында РФ Хөкүмәте, федерация субъектлары органнары һәм “Газпром” белән берлектә 2023 елга кадәр урамдагы газ челтәрен бушлай тоташтыруны тәэмин итү. Әлбәттә, биләмәгә торба сузган өчен түләргә туры килә.

Бу җәһәттән Республика башлыгы Радий Хәбиров хөкүмәттә үткән оператив киңәшмәдә БР хөкүмәте премьер-министрының беренче урынбасары Илшат Таҗетдиновка ташламалы газификация программасында катнашучылар даирәсен киңәйтү мөмкинлеген карарга кушты.

Хәтерегездә булса, Башкортстанда йорт хуҗалыкларын газ челтәренә тоташтыру буенча бурычны тормышка ашыру 2019 елда ук башланган иде. Ул чакта республикада гражданнарның ташламалы категорияләренә торак йортларны газлаштыруга сертификатлар бирелә башлады.

Илшат Таҗетдиновка мөрәҗәгать итеп, Радий Хәбиров:

- Сез бу проект белән шөгыльләнгән идегез. Кайбер категория кешеләргә газлаштыруга киткән чыгымнарны республика хисабына компенсацияләвебез хәтерегездәдер. Бәлки, бу программада катнашучылар санын арттыру өчен акча өстәрбез? – диде.

Эшләр болай дәвам иткәч, хөкүмәт тарафыннан сизелелерлек ярдәм булгач, йортларга газ кертүнең күпкә җиңелләшүе көн кебек ачык. Әлбәттә, “Газпром” йортларга газ үткәрүне, кешеләрне категорияләргә бүлми, барысына да бушлай башкарса, бу мәсьәлә тагын да тизрәк хәл ителер иде.

Руфина ТАҖИЕВА
Өмет
№ --- | 12.05.2021