12.04.2021 Мәдәният

Бүген Татарстаннын халык артисты Лена Бичаринаның туган көне (уникаль ФОТОЛАР)

Сәхнә остасын гомер бәйрәме – күркәм юбилее белән тәбрик итәбез һәм исәнлек-саулык, озын гомер, иҗат уңышлары телибез.

Лена Бичарина – киң диапозонлы, татар мелизмнарына бай меццо-сопрано, горур яңгырашлы бәрхет тавышка ия җырчы. Ул 1951 елның 12 апрелендә ТАССРның Апас районы Иске корбаш авылында (хәзер Кайбыч районы Мәлки авылы) туып үсә.

1975 елда ул Габдулла Тукай исемендәге Татар дәүләт филармонияснең – Татар дәүләт җыр һәм бию ансамбленә зур конкурс аша үтеп, хор группасында җырлый башлый. Лена Бичарина ансамбльнең җәүһәр ташыдай бер солисты буларак, бик күп илләрдә, шәһәр-авылларда татар җырларын, керәшен моңнарын тамашачы йөрәгенә салып калдыра. Хорда эшли башлаган елында ук аның башкаруында яңгыраган «Чатырлар» җыры татар тамашачысының күңелен җәлеп итә. Хор өчен «Сандугачкай», «Зәңгәр чиләк» җыры Ә.Х.Абдуллин Бичарина тавышына махсус эшкәртә. Җырчы үз репертуарын композиторлар әсәрләре, халык җырлары белән баета. 1981-1985 елларда Казан музыка училищесында (вокал бүлегендә) белем ала. Лена Бичарина 1994 елда филармониянең эстрада бүлегенә күчә, 1995 елда лаеклы ялга чыга.

Лена Бичаринага 2001 елда Татарстанның атказанган артисты, 2011 елда Татарстанның халык артисты дигән мактаулы исемнәр бирелә. Татарстаннын халык артисткасы, жырчы Лена Бичарина соңгы елларда Габдулла Тукай исемендәге Татар дәүләт филармониясе сәхнә ветераннарын берләштергән «Илһамият» клубы иҗат әһелләре белән төрле чараларда катнаша, концертларда чыгыш ясый.

Сулдан (беренче рәт): Венера Гәрәева, Мәхмүт Нигъмәтҗанов, Рәмзия Зиннәтуллина, (икенче рәттә): Гөлнәфис Сәлимгәрәева, Искәндәр Биктаһиров, Лена Бичарина. 1980 еллар башы

Татар дәүләт җыр һәм бию ансамбле коллективы, шагыйрь Ренат Харис. Лена Бичарина уңнан (икенче рәт) беренче. Италия. 1979 ел

Татар дәүләт җыр һәм бию ансамбле Грузидә гастрольдә чакта. Лена Бичарина (артта) уңнан беренче. 1980 еллар

Ансамбль турында фильм төшерү вакытында. Лена Бичарина уңнан беренче.Татарстан. 1979 ел

Ансамбль артистлары демонстрациядә очрашкач. Уртада – Хәнәви Шәйдуллин, уңнан беренче – Лена Бичарина. Казан. 1970 ел

Лена Бичарина, баянда Геннадий Максимов. 1990 нчы еллар

Лена Бичарина һәм Анатолий Шутиков җитәкчелегендәге Татарстан Республикасы халык уен кораллары дәүләт оркестры. 2004 ел

Габдулла Тукай исемендәге Татар дәүләт филармониясе сәхнә ветераннары һәм яшь башкаручылар. Чистай шәһәре. 2018

Татар дәүләт филармониясе сәхнә ветераннары «Илһамият» клубы иҗат әһелләре концерты. Лена Бичарина һәм баянчылар: Ф.Хатыйпов, Хәйдәр Сафин. Г.Тукай әдәби музее бакчасы. 2018 ел