“ТӘРТИП FM”: ТАТАРДА ЯҢА РАДИО ЭШЛИ БАШЛАДЫ

“Тәртип FM” оештыручылары “Ватаным Татарстан” редакциясе конференц-залында журналистлар белән очрашу үткәрде. Бу радио турында имеш-мимешләр күптән йөри иде инде. Кулыма инде бер ай элек үк эләккән реклама буклетында “Тәртип FM” логотибы бар иде. Ниһаять, барысы да ачыкланды.

87,8 FM диапазонында сөйли башлаган “тәртипле” радионың директоры Марат Ибляминов икән. Ул “Европа плюс” директоры да (ике радио да бер хуҗага карый). Ә музыкаль редактор Камил Бикмөхәммәтов. Ул заманында “Адымнар”да, “Татар радиосы”нда эшләде, бер ара югалып торган иде.

Яңа радио моңлы җырларны гына әйләндерергә уйлый. Күбесе югалып барган җырлар, халык җәүһәрләре. Марат Ибляминов 7 меңләп җырдан торган архивны 10 ел җыйган икән. “Тәртип FM” радиосы Ленская урамы 10 йортта урнашкан (Мәскәү базарыннан ерак түгел). Үзенең сайты да бар – www.tartip.ru. Әлегә радио тест режимында бер атна чамасы эшли. Тагын биш айдан әлеге ешлыкның кемгә буласын конкурс хәл итәчәк. “Тәртип FM”ның уннан артык көндәше бар. Әмма татар радиоларыннан ул берәү генә. Димәк, һәр татар кешесе үзенең көченнән килгәнчә ярдәм итәргә тиеш. Ничекме? Тыңлап, күршесенә сөйләп, хатлар язып, шалтыратып...

Марат Ибляминов белән Камил Бикмөхәммәтов бик кызып-кызып, бер-берсен бүлдерә-бүлдерә сөйләделәр. Күренеп тора, бу идея белән чын-чынлап яналар! Тик кайбер көндәшләрен һәм, гомумән, бүгенге татар эстрадасын кискен тәнкыйтьләп атулары ошамады. Аеруча “Хомай”ның “Колбаса” җырына, Шәкүрнең “Бик еракта идек без” ремиксына, Әлфинә Әзһәмовага, Иркәгә ярыйсы гына эләкте. “Стоматологиядә радио уйный иде, берзаман Әлфинә Әзһәмова җырлый башлады. Һәм шуннан соң мин инде бор-машинадан курыкмый ук башладым,” – диде Ибляминов шаярып. Ә моңарчы эшләп килгән бер татар FM-радиосының директоры (хәер, алар Казанда өчәү генә): “Тәртип FM”нан нафталин исе килә”, - дигән. “Кем икән ул нафталин исе чыгаручы? Илһам Шакировмы? Рәшит Ваһаповмы?” – дип аптырадылар матбугат конференциясендә. Хәер, “Тәртип FM”чылар башка радиоларга конкурентлык булдырмыйбыз, ә буш нишага кереп утырмакчы булабыз диләр. Экономист Марат Ибляминов исәпләп чыгаруынча, Казанда әле тагын бер сигезләп татар радиосы ачарга мөмкин. Ничек булып бетәр...

P.S. “Тәртип FM” турында тулырак “Ватаным Татарстан” (Алсу Хәсәнова яза), “Татарстан яшьләре” (Флүрә Низамова), “Безнең гәҗит” (Илфат Фәйзрахманов), “Ирек мәйданы” (Римма Бикмөхәммәт), “Мәдәни җомга” (Эльмира Сираҗи) газеталары язачак. Матбугат конференциясендә нәкъ шулар бар иде.

Фотода: сулда - Камил Бикмөхәммәтов, уңда - Марат Ибляминов.