Булат Җиһаншинның яңа клибында төшкән рус кызы белән ӘҢГӘМӘ

Күптән түгел генә җырчы Булат Җиһаншинның "Үпкәләмим. Көтмим. Өметләнмим" дип аталган клибы дөнья күрде. Әлеге клипта төп рольдә рус кызы Анна Никишкина төшкән. Сезнең игътибарга Анна белән әңгәмә тәкъдим итәбез:

- Анна, ничек эләктең татар клибына?

- Минем фотоларымны инстаграмда күреп таптылар.

- Булат белән эшләү ничек?

- Бик күңелле! Кайчак көлүдән туктап булмый иде. Булат җиңел һәм аралашучан кеше, шуңа төшүнең бер авырлыгы да булмады.

- Татар музыкаль телеканалларын караштыргалый башламадыңмы?

- Телевизорны болай да бик карамыйм. Ә инде ютубтан "Үпкәләмим" җырын куеп - биеп, кушылып җырлаштыргалыйм.

- Клипка кемнәр макияж һәм кием стилен уйлап тапты?

- Төшерүләргә әзерлек барганда Булат: бары да гадәти тормыштагыча булырга тиеш, бу пафослы клип түгел, ничек бар шулай булырга тиеш, - диде. Шуңа макияжны да, чәчемне дә, кием стилен дә үземчә көндәгечә ясап төштем.

- Үзең турында сөйлә. Кияүдәме?

- Әйе кияүдә. Ирем - Дмитрий. Аңарга 26 яшь, миңа бүген (2нче декабрь) 21 яшь тулды. Быел өйләнештек. Мин әзерләргә яратам, ә ул - тәмле ашарга.

- Ул ничек карады син клипта төшкәнеңә?

- Мактады, горурланам, диде.

- Чакырсалар - алда да клипларда төшергә ниятең бармы?

- Әлбәттә, яңа проектларга шат булырмын. Кешеләр таныганда - бик күңелле.

- Кеше танып берәр кызык ситуация булмады соң?

- Әйе, бер көнне урамнан барганда, бер таныш булмаган апа, елмаеп каршыма килеп, нәрсәдер сөйли башлады. Аптырап калдым. Аннан соң "клип", "үпкәләмим", "Булат" сүзләрен ишеткәч - мин дә елмаеп баш селки башладым. Шуннан, ул нидер сорап, җавап көтеп торган кебек булгач: Извините, пожалуйста, я ведь не понимаю, - дидем. Ул да аптырап калды. Көлеп җибәрде дә, җыр белән клипны русча мактый башлады. Чыннан да бик матур җыр бит.

- Синең матурлык сере?

- Сере юк инде аның.Үзеңне яратырга кирәк, сәләмәт тормыш алып барырга, спорт белән шөгелләнергә. Иң мөһиме ирем мәхәббәте бик ярдәм итә.

- Рәхмәт, Анна. Туган көнең белән котлыйбыз.