«ИНТЕРТАТ»НЫҢ ЯҢА КӘЛӘШЕ ЭЛЬВИРА ШАКИРОВАГА «6» САНЫ БӘХЕТ КИТЕРГӘН

Intertat.ru электрон газетасында эшләүче иң чибәр кызларның берсе – Эльвира Шакирова тиздән гаиләле булачак. Кияү – Питрәч районы Чыты авылы егете. Алмаз исемле. Һөнәре журналистикадан би-ик ерак.

«2008 елның 6 октябрь кичендә таныштык, – дип сөйли Эльвира, – Ул көнне безгә кунакка иптәш кызым килде. Дустым кич белән өйдә утырмыйк дип урамга алып чыкты. Баксаң, ул егетләр белән очрашырга сүз куешкан булган икән, чөнки анда безне егетләр көтеп тора иде. Шуларның берсе Алмаз булып чыкты. Алмаз бик сабыр, тырыш, акыллы егет. Аның белән очраштырган, кавыштырган язмышыма рәхмәтлемен».

Эльвира «6» санын бәхетле сан дип уйлый. Никахлары да 6 августта булган. Туй исә 25 сентябрь көнне Кабан күле буенда урнашкан «Татэнерго» оешмасының кафесында гөрлисе. Ә язылышу Казанның Яңа Савин районы ЗАГСында буласы ди. Туйны шоумен Илдус Закиров алып барыр дип көтелә. Хәзер яшьләр Илдус белән бергә программа өстендә баш ваталар. Туйга Эльвираның җырчы дуслары ИлГәрәй, Алинә Сафиуллина һәм Сөмбел Билалова да чакырулы.