“Вирусны җиңгәнгә кадәр көрәшәчәкбез”

- Безнең лабораториягә бөтен өлкәдән коронавирус шиге булган авыруларның анализларын китерәләр. Диагноз раслана икән, мин бу авыру, гаиләсе һәм аның белән элемтәдә булган кешеләр турында мәгълүмат туплыйм. Лаборантлар өлгермәгән оч-ракта, без, табиблар, аларга язуларын тутырырга ярдәм итәбез, - дип сөйли Лилия Наил кызы.

 

...Ул тумышы белән Камышлы районының Яңа Ярмәк авылыннан. Әнисе Зөлфия Шиһапова 40 ел буе фельдшер-акушер пункты мөдире булып эшләп, быел гына лаеклы ялга киткән. Лилия дә кечкенәдән медицинага гашыйк. Мәктәпне тәмамлаганнан соң, Самара медицина университетына укырга керергә теләге бик зур булса да, баллары җитеп бетмәү сәбәпле, балачак хыялын чынга ашыра алмый. Тик үҗәтле кыз хыялыннан баш тартмый, максатына ирешү өчен Самараның Тимер юл медицина училищесының медицина-профилактика факультетына укырга керә. Ә төнлә М.И. Калинин (бүген В.Д.Середавин) исемендәге өлкә хастаханәсендә санитарка булып эшли.

 

Өченче курста укыганда булачак табибә кияүгә чыга. Ире Мөдәррис белән баштан кызлары Азалиягә тормыш бүләк итәләр. Ә бер елдан инде уллары Дамир туа. Лилия укырга да, эшләргә дә, йорт хуҗалыгын алып барырга да өлгерә. “Мөдәррис вахта ысулы белән Себердә эшли. Өйдә чакта балалар белән ул утыра. Ә әтиләре эштә чакта әнием ярдәмгә килә. Аңа чиксез рәхмәтлемен!” - ди Лилия.

 

Кулына диплом алганнан соң, яшь белгеч шәһәрнең Совет районы санитар-эпидемиологик хезмәте үзәгенә табиб ярдәмчесе булып эшкә урнаша.

 

- Биредә мин практик белемемне ныгыттым. Туплаган тәҗрибәм киләчәк эшчәнлегемә ныклы нигез булып ятты, - дип сөйли Лилия Наил кызы.

 

Өлкә гигиена һәм эпидемиология үзәгендә эш тәкъдим иткәч, Лилия, бер дә икеләнмичә, ризалаша, күптәнге хыялын чынга ашырып, медицина университетына укырга керә. Бүген инде үзе дә Самара дәүләт медицина университетында “Медицина-про-филактика эше” дисциплинасы буенча белем бирә.

 

Эпидемиологның вазифалары санап бетергесез: өлкәдә санитар-эпидемиологик режимны саклау, халыкның иминлеген тәэмин итү, аңлату эшләрен, прививка кампаниясен алып бару һәм башкалар. Лилия Наил кызы балалар бакчаларын, мәктәпләрне тикшерә, туберкулездан профилактика үткәрә.

 

Өлкәбездә коронавирус пандемиясе башлангач, эпидемиологларның эшләре тагын да арта. Беренче вакытта регионда бу авыруны ачыклау мөмкинлеге булмый. Өлкә гигиена һәм эпидемиология үзәге табиблары, шул исәптән Лилия Шәрәфетдинова да, көн аралаш диярлек, сәламәтлекләрен куркыныч астына куеп, вируска шикләре булган пациентларның биоматериалларын самолет белән Новосибирск һәм Мәскәү вирусология үзәкләренә илтеп йөрделәр.

 

- Әлбәттә, аэропортта һәм очкычта COVID-19 вирусы белән зарарлану ихтималы бик зур. Тик беребез дә: “Бармыйбыз!” – дип әйтмәдек, чөнки бу – безнең эшебез, һәм без аны җиренә җиткереп башкарырга тиешбез. Аллаһыга шөкер, Самарага кирәкле җи-һазлар сатып алынды, хәзер бөтен анализларны да үзебездә ясыйлар. Шулай да эш күп, өйгә кичке тугыз-уннарда гына кайтабыз, - дип көрсенә Лилия Наил кызы. Юк, арыдым, дип әйтми ул, гаиләсенә вакыты калмауга борчыла.

 

Моннан җиде ел элек Мөдәррис белән Лилиянең Камилла исемле кызлары туган иде. Бала әнисенең өйдә булуын тели, әлбәттә. Ә Азалия белән Дамир инде зурлар. Беренчесе Самараның 90 санлы гомумбелем бирү һәм 4 санлы сәнгать мәктәпләрен бишле билгеләренә генә тәмамлап, Казанның мәдәният институтына укырга кергән. Бүген Азалия “Сурәтләү сәнгате культурасы” (“Художественная культура изобразительных искусств”) факультетының 3нче курсында белем ала. Ә Дамир Самара аэрокосмик университетының беренче курсын тәмамлаган. Алар әниләренең хезмәтен бик яхшы аңлыйлар һәм кулларыннан килгәнчә ярдәм итәргә тырышалар. Өйдә чагында Мөдәррис тә хатыны эштән кайтуга тәмле ашлар пешереп куя, балаларны тәрбияләүне үз өстенә ала.

 

“Әлеге пандемия барыбыз өчен дә зур сынау булды. Шулай да төшенкелеккә бирелмәбез, вирусны җиңүгә кадәр көрәшәчәкбез”, - дип елмая Лилия Наил кызы.