11.09.2020 Мәдәният

Илһам Шакировның туган авылында җырчыга бюст ачылды (ФОТО)

Татар халкының легендар җырчысы, Россиянең һәм Татарстанның халык артисты Илһам Шакировка туган авылы -
Тукай районы Яңа Бүләктә бюст ачылды. Бюстны Санкт-Петербург сынчысы Венера Абдуллина ясаган. Ул Илһам аганың музее каршында урнашкан, дип хәбәр итә Татар дәүләт филармониясенең матбугат хезмәте.

Бюстны ачу тантанасын Тукай районы башлыгы Фаил Камаев башлады.

«Узган ел республика күләмендә зур чара үткәргән идек. Шунда ел саен Илһам абыйны искә алу өчен җыелырбыз, дип вәгъдә бирдем.

Дөнья афәте килеп чыкканга булмас дигән идек, тик Илһам абый үз авылында җыйды. Илһам абыйга багышланган Республика күләмендә үтәчәк фестивальләрнең берсен шушында үткәрүне безгә йөкләсәләр бик рәхмәтле булыр идек», — дип сөйләде ул.

"Бу — кабатланмас моң үзәге, ул гөрләп торырга тиеш. Фестивальләр, бәйгеләр, концертлар, музыка дәресләре — сукмакка тузан кунмасын!

Бакыйлыкка киткәч тә Илһам ага милләт өчен эшен дәвам итә. Без һәрвакыт аның өчен дога кылабыз. Туган ягында август-сентябрь айларында зур концерт ясарга кирәк. Бу якны без зурлап күрсәтергә тиешбез», — диде ачылыш тантанасында Татарстан Республикасы Премьер-министры урынбасары Васил Шәйхразиев.

Бюст ачу тантанасында Илһам Шакировның туганнары, Татар филармониясе җитәкчелеге һәм артистлары, язучылар, җырчының якташлары катнашты. Соңыннан кунаклар Илһам Шакировның музее белән таныштылар.

---
Татар дәүләт филармониясе
№ --- | 11.09.2020