09.09.2020 Мәдәният

Бүген Әлмәттә драма театры артисты Фазыл Насыйбуллинны соңгы юлга озаталар

Кичә Әлмәттә 44нче яшендә Татар дәүләт драма театры артисты Фазыл Насыйбуллин вафат булган. Бу хакта театрның социаль челтәрләрендә хәбәр ителә.

Фазыл Насыйбуллин 1976 елның 11 октябрендә Иске Чаллы авылында туа. 1999 елда ул Казан сәнгать академиясен тәмамлый һәм Әлмәт драма театрында эшли башлый.

Артист белән хушлашу бүген, 9 сентябрь көнне 11:00 сәгатьтә шәһәрнең үзәк мәчетендә узачак.

Фото: театр сайтыннан

Посмотреть эту публикацию в Instagram

ТИРӘН КАЙГЫ Әлмәт татар дәүләт драма театрының талантлы артисты, Татарстанның атказанган артисты Фазыл Кәрип улы Насыбуллин якты дөньядан мәңгегә китте. Насыйбуллин Фазыл Кәрип улы 1976 елның 11 октябрендә Әлки районы Иске Чаллы авылында туа. 1999 елда Казан дәүләт мәдәният һәм сәнгать академиясен тәмамлый һәм Әлмәт татар дәүләт драма театрына кабул ителә. Әлмәт шәһәр башлыгы тарафыннан “Ел актеры” премиясе лауреаты – 2009, 2015 еллар. Уйнаган рольләре шактый күп hәм киңкырлы: Исмәгыйль – “Җырланмаган җыр” (М.Кәрим), Азамат – “Көзге романс” (З.Хәким), Фәнил – “Гүргә керер сер иде” (Р.Кинҗәбаев), Горилла – “Безнең гомер язлары” (Ф.Садриев), Апуш – “Юмарт хатыннар” (Т.Җүҗәноглу), Афзал – “Әлфия белән Афзал, яки шимбә көн кич белән” (Г.Хугаев), Алмаз – “Тальян моңы” (Ш.Бикчурин), Морат – “Студентлар” (Н.Гаетбай), Басыйр – ”Кодача” (З.Исмәгыйлев), Габдулла – “Тигезсезләр” (Ф.Әмирхан), Яшь Сәүбән – “Парлы ялгызлар” (Д.Салихов), Ильяс – “Кыз урлау” (М.Кәрим), Җәмил – “Булмас димә – дөнья бу” (С.Белов), Исмәгыйль – “Сүнгән йолдызлар” (К.Тинчурин), Фәрит – “Тәүбә” (Г.Каюмов), Мирзаһит – “Оҗмах капкасы” – (М.Гыйләҗев), Рәсим – “Балакаем” (И.Зәйниев), Әхтәм – “Кызлар килде авылга” (Н.Гаетбай), Гарәфи – “Банкрот” (Г.Камал), Арслан – “Туган-тумача” (И.Зәйниев), Рәшит – “Назлы кияү” (К.Тинчурин), Равил – “Сагынуларга ни чара?” (И.Зәйниев), Әмирхан – “Кыю кызлар” (Т.Гыйззәт), Монтеки – “Ромео һәм Джульетта” (У.Шекспир), Солтанбәк - “Аршин мал алан” (Г.Хаҗибәков), Икенче Алла, Ир – “Бистә фәрештәсе” (Б.Брехт), Вилдан – “Яшь йөрәкләр” (Ф.Бурнаш), Жеронт – “Әҗәлгә дару бар диләр” (Ж.Б. Мольер), "Микулай" (М. Гыйләҗев), "Көзге сере"(Арсений Фарятьев), Кайда минем илем?.."(Гарәф Фәхретдинов). Фазыл Насыбуллин тамашачылары, хезмәттәшләре, дуслары, туганнары күңелендә якты истәлеге мәңге сакланыр. Аллагы Тагалә гаиләсенә, туганнарына, дусларына, барлык якыннарына бу авыр көннәрне уздырып җибәрергә җиңеллек һәм чиксез сабырлык бирсен. Моннан соң кара кайгы, ачы хәсрәт күрсәтмәсен. Фазыл Кәрип улының яткан гүрләре киң, якты, иман нурлы булып, урыннары оҗмах түрләрендә булса иде.

Публикация от Альметьевский театр (@almet_teatr) 8 Сен 2020 в 8:41 PDT

---
Матбугат.ру
№ --- | 09.09.2020