06.08.2020 Мәдәният

Быел «TAMGA» режиссерлар лабораториясе әкиятләргә багышлана

1–8 августта Г.Кариев исемендәге Казан Татар дәүләт яшь тамашачы театрында II нче «TAMGA» режиссерлар лабораториясе уза. Быел ул халык һәм автор әкиятләренә багышланган. Лабораториядә төрле шәһәрләрдән режиссерлар катнаша: Марфа Горвиц (Мәскәү), Павел Зобнин (Томск), Регина Саттарова (Казан), шулай ук бер эскизны «ASYL» I Бөтенроссия драматургия конкурсы нәтиҗәләре буенча Кариев театры яшь режиссеры Эльдар Гатауллин куя.

Режиссерлар 1 – 7 август көннәрендә театр артистлары белән берлектә балалар һәм яшүсмерләр өчен спектакль эскизлары әзерләп, 8 августта аларны тәкъдим итәчәкләр. Татар халык әкиятләре буенча Марфа Горвиц «Камыр Батыр» һәм Павел Зобнин «Падишах хатыны һәм Алтынчәч» эскизларын куячаклар. Регина Саттарова Габдулла Тукайның «Печән базары, яхуд Яңа Кисекбаш» шигъри әкияте буенча эскиз-бродилка тәкъдим итәчәк. Эльдар Гатауллин исә Алексей Житковскийның «Бүре башлы кыз» әкиятен куя. Әлеге пьеса 2020 елның февраль аенда узган пьесалар «читка»сы вакытында иң күп тамашачы тавышын җыйды, бу аның «TAMGA» лабораториясендә катнашуын билгеләде.

II нче «TAMGA» режиссерлар лабораториясе кысаларында куелган эскизларны карар өчен критиклар Алексей Гончаренко (Мәскәү) һәм Андрей Пронин (Санкт-Петербург) чакырылды.

Эпидемиологик вәзгыятькә бәйле рәвештә эскизларны тәкъдим итү ябык форматта узачак.

Хөрмәтле журналистлар! 7 августның 17 сәгать 00 минутка кадәр (843) 237-93-27 телефоны яисә kariev_theatre@mail.ru электрон почтасы аша аккредитация узуыгызны сорыйбыз. Театрга кергәндә барлык саклык чараларын күрүен сорыйбыз: үзегез белән битлек һәм перчаткалар алырга онытмагыз.

TAMGA-2020 лабораториясе эскизларын тәкъдим итү

8 август (шимбә)

№	Вакыты	Эскиза исеме	Режиссер	Урыны
1	16:00-17:00	«Кисекбаш»	Регина Саттарова	Театр каршындагы мәйдан (15-20 минут) Театр бинасына күчү (10 минут) Фойе (30 минут)
-	17:00-17:30	Эскиз турында сөйләшү		Большой зал
2	17:30-18:00	«Камыр Батыр»	Марфа Горвиц	Зур зал
-	18:00-18:30	Эскиз турында сөйләшү		Зур зал
	18:30-19:30	ТӘНӘФЕС
3	19:30-20:30	«Бүре башлы кыз»	Эльдар Гатауллин	Театр каршындагы мәйдан
-	20:30-21:00	Эскиз турында сөйләшү		Фойе
4	21:00-21:30	«Падишах хатыны һәм Алтынчәч»	Павел Зобнин	Зур зал
	21:30-22:00	Эскиз турында сөйләшү		Зур зал

Кыскача белешмә: беренче «TAMGA» режиссерлар лабораториясе Кариев театрында 2019 елның апрелендә узды. Анда Россиянең төрле төбәкләреннән чакырылган 4 яшь режиссер катнашты: Мәскәүдән – Екатерина Корабельник һәм Александра Ловянникова, Уфадан – Ильшат Мөхетдинов, Норильск шәһәреннән – Тимур Фәйрузов. Лабораториядә туган эскизлар зур кызыксыну уятты. Алар үзенчәлекле иде һәм һәрберсе үз тамашачысын тапты. Дүрт эскизның икесе тулы спектакль булып репертуарга керде. «Сәлам, Актәпи» (Е.Корабельник) һәм «Йомрыбаш» (А.Ловянникова) спектакльләренең премьералары 2019 елның көзендә узды.

---
Кариев театры
№ --- | 06.08.2020