30.04.2020 Бәйрәм

Татарстанда легендар "День победы" җыры беренче тапкыр татар телендә яңгырады (ВИДЕО)

Бөек Ватан сугышында Җиңүнең 75 еллыгына багышланган «Безнең Җиңү көне» Бөтенроссия марафонында Татарстан Республикасы катнашты. Флешмобта катнашучылар «Җиңү көне» җырын беренче тапкыр рус һәм татар телләрендә башкарды.

«Идел буе федераль округында Бөек Ватан сугышына багышланган җыр флешмобы уза. Әлеге акция Идел буе федераль округы төбәкләрен берләштерергә мөмкинлек бирәчәк һәм барлык халыкларның мәдәни үзенчәлеген саклаячак», - диде Казан мәдәният һәм сәнгать институты ректоры Роза Әхмәдиева.

«Җиңү көне» җырын Россиянең һәм Татарстанның халык артисты Винера Ганиева, Татарстанның атказанган артистлары Әлфис Галиуллин һәм Эльвира Галиуллина, «Голос. Дети» проектында катнашкан Айгөл Вәлиуллина, шулай ук мәдәният институты укытучылары, доцентлары һәм магистрлары башкарды, дип яза Татар-информ.

«Һәр артист Бөек Җиңүнең 75 еллыгына багышланган акция һәм флешмобларда бик теләп катнаша дип уйлыйм. Бу – безнең сугыш ветераннары, бабайларыбыз һәм әтиләребезгә рәхмәт һәм хөрмәт билгесе. Алар үзләренең яшьлеген, сәламәтлеген һәм көчләрен кызганмыйча Җиңү таңын якынайтты», - диде Винера Ганиева.

Артистлар әйдәп баручы региональ мәдәният, фән, мәгариф һәм сәнгать үзәге – Казан мәдәният һәм сәнгать институты, шулай ук Казан Кремле диварлары, шагыйрь, Советлар Союзы Герое Муса Җәлил һәйкәле янында чыгыш ясады.

Аудио- һәм видеоролик республика гаммәви мәгълүмат чараларында, шулай ук #нашденьпобеды, #песнипобедыПФО хэштеглары белән сайтларда һәм социаль челтәрләрдә трансляцияләнәчәк. Татарстан Республикасы эстафетаны Түбән Новгород өлкәсенә тапшырды.

---
Матбугат.ру
№ --- | 30.04.2020