07.04.2020 Шоу-бизнес

Әнвәр Нургалиевның әнисе коронавирустан үлгән? Башкортстан башлыгы Радий Хәбиров моны инкарь итте

Кичә Әнвәр Нургалиевның әнисе 80 яшьлек Нәсимә араның вафат булуы хакында күңелсез хәбәр килеп ирешүе турында язган идек. Бүген аннан да күңелсезрәк хәбәр килде: җырчының әнисендә дә коронавирус тапканнар. Бу хакта «Комсомольская правда» һәм әлеге чыганакка сылтама белән башка күп кенә газеталар яза. Ләкин "Матбугат.ру" ачыклаганча, Нәсимә Нургалиева коронавирус авыруыннан үлмәгән.

Җырчы сүзләренчә, соңгы ике айны мәрхүмә, чыннан да, хастаханәдә үткәргән. Башкортстанның сәламәтлек саклау министры Максим Забелин аның коронавирусны хастаханәдә йоктыра алуын аңлата. Бүгенге көндә Уфаның Куватов исемендәге республика клиник хастаханәсен карантинга япканнар. Үлгән кеше белән элемтәгә керүчеләрнең барысын да РКБда карантинда калырга мәҗбүр иткәннәр. РКБ яңа авыруларны әлегә кабул итми.

Массакүләм чараларда таралган имеш-мимешләргә ноктаны Башкортстан башлыгы Радий Хәбиров куйды. Ул Нәсимә Нургалиеваның коронавирус авыруыннан вафат булуын инкарь итеп, социаль челтәрдә комментарий биргән:

“Пациентканың хәле күп хроник авырулары сәбәпле бик авыр булган. Ул бот өлешенә ампутация кичегән, эренләү процессы башланган, озакка сузылган пневмония күзәтелгән. Үлемнең сәбәбе – кан тамырлары зарарлануы нәтиҗәсендә үсешкән ишемик инфаркт фонында баш миенең шешенүе.

Патологоанатомик тикшерүдә барлык пневмония очракларында да таләп ителгәнчә, COVID-19га анализ алынган. Беренче нәтиҗә шикле булды. Шулай да бүген пациенткада коронавирусның булуы ачыкланды. Әлеге очракта үлем сәбәбенең коронавирус булмавын аңлау мөһим. Ләкин мондый хәлдә тиешле хезмәтләр ныклы хәвефсезлек чараларын күрергә тиеш. Моны барыгызның да аңлавын сорыйбыз. Коронавируслы пациентка белән аралашкан һәркем карантинда булырга тиеш. Бу – тирә-ягыбыздагыларның гомерен һәм сәламәтлеген саклап калу өчен мөһим булган, закон белән расланган регламент,” – дип яза Радий Хәбиров.

---
Матбугат.ру
№ --- | 07.04.2020