“Сүнгән йолдызлар” – 30 елдан соң кабат Камал театры сәхнәсендә (ВИДЕОКӨНДӘЛЕК)

Спектакльнең режиссеры - Фәрит Бикчәнтәев, рәссамы - Сергей Скоморохов, пластика буенча режиссеры - Ольга Даукаева.

Спектакльдә Россиянең һәм Татарстанның халык артисты Алсу Гайнуллина, Россиянең атказанган артисты Дания Нуруллина, Татарстанның атказанган артисты Алмаз Сабирҗанов, шулай ук, Эльвир Сәлимов, Алинә Мөдәрисова, Айгөл Абашева, Раил Шәмсуаров, Алмаз Борһанов һәм Мәдәният институты студентлары катнаша.

 

Төп геройларның берсе Надир Мәхдүмне уйнаучы актёр Алмаз Сабирҗанов: “Әлбәттә, шәхсән миңа бик зур бәхет елмайды. Төп герой, бик катлаулы персонажны уйныйм. Бик дулкынландыргыч, каушата. Миңа калса, бу әсәр уңышлы һәм нәтиҗәле булачак”, - ди.

 

Камал театры матбугат хезмәте хәбәр иткәнчә, 1970 елларда Сәлимҗанов куелышындагы "Сүнгән йолдызлар" спектакле бик зур уңыш белән барды. Пьесаның мистикага нигезләнгән һәм имчелек белән көчәйтелгән антимилитар пафосы бүгенге көндә бигрәк тә актуаль яңгырый. Этнографик детальләргә, поэтик бизәкләргә бай әсәр режиссерның иң кыю визуаль идеяләрен тормышка ашырырга ярдәм итәр, ә труппага классик кануннарның мәгънәсенә төшенергә мөмкинлекләр тудырыр дип көтелә.

 

Пьеса антагонист-геройлар булмавы белән үзенчәлекле. Сәрвәр белән Исмәгыйльгә каршы торучы көч Надир Мәхдүм түгел, хәтта имче карчык та түгел, ә наданлык, үлемгә илтүче милитаризм, тәкъдир - болар барысы да "Сүнгән йолдызлар" әсәрен антик трагедиягә якынайта. Сюжетның мелодрама жанрында булуы, тамашачының кызыксынуын тагын да арттыра. Әлбәтта, сюжетның беренче планы артында режиссер геройлар арасында башка төрле мөнәсәбәтләр корачак һәм танылган әсәрнең яңа мәгънәләрен ачачак.