15.11.2019 Мәдәният

Казанда “Фатима Ильскаяның сүнмәс таланты” күргәзмәсе ачыла

2019 елның 19 ноябрендә 14.00 сәгатьтә “Фатима Ильскаяның сүнмәс таланты” күргәзмәсе ачыла. Күргәзмә республикабыз үсешенә зур өлеш керткән бөек ватандашларыбыз тупланмаларын тәкъдим иткән ТАССР оешуга 100 ел тулуга багышланган “ТАССР 100 еллыгына 100 исем” музей-белем бирү проекты кысаларында уза.

Хуҗасәетова Фатыйма Салих кызы (Фатыйма Ильcкая) – театр һәм кино актрисасы, РСФСР һәм Татарстан АССР халык артисткасы.

Иҗат эшчәнлеген 1915 елда “Ширкәт” оренбург татар драма труппасы составында башлый. 1916 елда Казанга килә һәм “Сайяр” труппасы составына кушыла. 1921-1923 елларда Ташкентта татар театрында эшли. Гомеренең күп өлешен Г. Камал исемендәге татар дәүләт академия театры сәхнәсенә багышлый.

Фатыйма Ильская үзенең иҗаты белән татар театрында милли сәхнә сәнгатенә нигез салучыларның берсе булып санала. Озын иҗат эшчәнлеге дәвамында рус һәм татар спектакльләрендә генә түгел, шулай ук чит ил авторлары әсәрләрендәге рольләрен дә югары осталык белән башкара: Дилбәр (“Җилкәнсезләр”, К. Тинчурин), Зөләйха (“Яшь гомер”, Г. Коләхметов), Фатыйма (“Тормыш җыры”, М. Әмир), Катерина (“Яшен”, Н. Островский), Татьяна, Софья (“Дошманнар”, “Соңгылар”, М. Горький), У. Шекспир трагедияләрендә, Лопе де Вега, П. Бомарше комедияләрендә катнаша. Иҗади эшчәнлеге өчен орденнар һәм медальләр белән бүләкләнә.

Күргәзмәдә документлар һәм хатлар, актриса шигырьләре язылган дәфтәр, гаилә альбомы һәм спектакльләрдән күренешләр, шәхси әйберләре һәм сәхнә киемнәре урын ала.

Фәнни - экспозиция бүлеге – (843) 292-01-20

ТР ММ пресса хезмәте – (843) 292-32-18

---
Милли Музей
№ --- | 15.11.2019