26 - 30 август көннәрендә Борис Полевой теплоходында татар яшьләре көннәре узды

Алдагы елларда теплоход Самара, Ульяновск, Тольятти, Болгар шәһәрләре аша үтсә, быел оештыручылар юнәлешне бераз үзгәртергә булганнар. Яңа маршрутка Россиянең нәкъ үзәгендә урнашкан Түбән Новгород, Ярославль, Кострома һәм Чебоксар шәһәрләре кертелгән иде.

 

Татар яшьләре көннәрен ачу тантанасында Татарстанның яшьләр эшләре министрының беренче урынбасары Тимур Сөләйманов, милли-мәдәни татар автономиясе Федераль Советының башкарма директоры Миләүшә Шәрәпова һәм “Идел” татар яшьләре үзәге җитәкчесе Ләйсән Сафина катнаштылар. Алар форум ачылу белән котлап, төрле төбәкләрдән килгән татар милли хәрәкәте активистларына бүләкләр тапшырдылар. Самара делегациясе җитәкчесе Фәрзанә Мәхмүтова, мәдәният үсешенә керткән өлеше өчен, Татарстан Республикасы Мәдәният министрлыгының Рәхмәт хаты белән бүләкләнде.

 

Форум бик күңелле һәм файдалы узды. Без, алдан әйтеп үткән шәһәрләрдә тукталыш ясап, татар җәмәгатьчелеге белән очраштык, җирле истәлекле урыннар белән таныштык. Ә теплоходта вокал, театр, тарих, милли киемнәр, журналистика буенча мастер-класслар, бәйгеләр узды.

 

Самаралылар форумнан алган тәэсирләре белән уртаклаштылар.

 

 

- Быел мин Татар яшьләре көнендә өченче тапкыр катнашуым. Һәр елны ул үзенчәлекле булып, бик кызыклы үтә. Төрле төбәкләрдән, хәтта чит илләрдән килгән яшьләр тиз арада уртак тел табып, якын дусларга әвереләләр.

 

- Быелгы форумда Ярославль шәһәре белән танышуым аеруча истә калачак. Теплоход анда кич белән барып җитте. Без шунда ук СССРның атказанган очучы-сынаучысы, ике тапкыр Советлар Союзы Герое Әмәт-хан-Солтан һәйкәлен карадык. Аның биографиясе шаккатырлык. Ул 603 хәрби очыш ясаган, берничә тапкыр үз гомерен куркыныч астына куеп, таранга барган.

 

Форум халкыбызның батырлары турында күбрәк белергә дә ярдәм итә икән.

 

 

- Татар яшьләре көннәрендә беренче тапкыр катнашуым. Моңа кадәр форум турында танышларымнан гына ишетеп белә идем. Алар анда никадәр кызыклы, күңелле булуы турында сөйләсәләр дә, моны үзем баргач кына аңладым. Яңа дуслар, танышулар, төрле чаралар, кич утырулар – барысы да гомерлеккә истә калачак.

 

Мин төрле мастер-классларда бик теләп катнаштым. Аеруча сәясәтче Руслан Айсин татар халкы тарихы турында кызыклы итеп сөйләде. Татарстанның атказанган артисты Миңгол Галиев та тәҗрибә уртаклашты.

 

Башка төбәкләрдән килгән делегатлар белән аралашып, проект эшчәнлеге, команда җыю, федераль грантларга ничек чыгып булуы турында сөйләштек.

 

 

- Проект эшчәнлегеннән тыш, делегатларны төрле бәйгеләр дә көтте. Монда самаралылар бер дә сынатмадылар. «Татар моңы» һәм «Татар биючесе» конкурсларында Юлия Карипова һәм Ләйсән Галәветдинова җиңделәр. Миңа исә “Татар кызы-2019” бәйгесендә җиңү бәхете елмайды. Бәйгенең беренче биреме – визит карточкасы иде. Мин “Чабата” җырын башкардым, ә кызлар чыгышымны татар биюе белән бизәделәр. Токмач кисүдә, татар халкының тарихын, фольклорын белүдә дә көч сынаштык. Бәйгедә катнашкан 6 кыз арасында беренче урын алуыма чиксез шатмын!

 

Татар яшьләре көннәре – яшь милләттәшләребез арасында тәҗрибә уртаклашу өчен менә дигән мәйданчык. Форумнан өлкә “Туган тел” татар оешмасының яшьләр бүлеге активистлары Самарада кызыклы проектлар булдыру, татар халкының гореф-гадәтләрен саклап калу һәм үстерү, оешмага күбрәк яшьләрне җәлеп итү буенча күп идеяләргә баеп кайттылар.

 

Җәмилә ШӘРИФУЛЛИНА.

 

Самара шәһәре.

 

РӘСЕМДӘ:Илмира МӘҖИТОВА (сулдан уңга), Фәрзанә МӘХМҮТОВА һәм Җәмилә ШӘРИФУЛЛИНА