Балалар бакчасы чир оясы да әле ул

Өстәп шуны гына әйтәсем килгән иде – балалар бакчасы чир оясы да әле ул. Биш яшендәге өлкән оныгыбыз шунда йөри башлаганнан бирле чир ияртеп кайтудан бушамый. Ул авыргач өйдәге ике яшьлек энесе дә чирләми калмый инде. Әле менә скарлатина дигәнен эләктереп кайтты. Онык йөри торган төркемдәге балаларның ата-аналары белән сөйләшкәннән соң, кызым ул чир белән инде берничә баланың авырып алганын ачыклаган. Ә тәрбиячеләр бу турыда ләм-мим. Хәер, өйгә чакыртылган табиб та оныкның скарлатина белән авырганын әйтсә дә, кәгазьдә икенче төр чир күрсәткәндер. Чөнки безгә бу чир турында мәгълүмат бирмәскә кушалар дигән. Димәк яшерәләр. Ни өчен? Балалар авырулары турындагы статистиканы яхшы итеп күрсәтер өченме? Әгәр беренче бала авырганда ук тиешле профилактика чаралары күрсәләр, төркемдәге башка балалар авырмас иде дә соң. Ә скарлатинаны интернетта җитди чир дип язганнар, бала организмына зарар китерүе дә мөмкин икән. Олы онык терелеп килә, хәзер ут йотып кечесенең авырачагына әзерләнәбез. Бер фатирда яшәгәч бактерия күчми калмагандыр инде.

 

Гаҗәп, социализм чорында онытылган чирләр кабаттан баш калкыта ахрысы. Медицина артка тәгәри дигән сүз инде бу. Мин яшәгән фатирның тәрәзәсе каршында балалар бакчасы урнашкан. Кайчак караштыргалыйм, ишегалдына йөрергә чыгалар бит. Тәрбиячеләр алып чыккан балаларны саныйм. 12-13 бала йөргән көннәр дә була, бу мөгаен төркемгә йөрүче балаларның яртысы гынадыр. Шулай бертуктаусыз авырыйлар, күрәсең. Ә бит тәрбиячеләргә барыбер, балалар саны әзрәк булса рәхәтрәк тә әле. Хезмәт хакы тегеләй дә, болай да тулысынча түләнә. Ата-аналар арасында йөргән хәбәрләр арасында шундые да бар, имеш кайбер тәрбиячеләр, әллә ни уйланып тормыйча, балаларның йокы сәгатендә форточкаларны киереп ачып куялар икән. Шулай итеп балаларны чирләтәләр. Монысына бик ышанып җитеп булмый, ата-аналар балаларын өф-өф итеп кенә тәрбиялиләр хәзер, җил дә тигезмәсләр иде.

 

Ирексездән хәзерге чорны үзебез балалар үстергән чор белән чагыштырасың. Тәрбиячеләр үз төркемендәге балаларның сәламәтлегенә бик тә игътибарлы иделәр бит. Чөнки хезмәт хаклары бакчага йөрүче балалар санына да бәйле иде аларның. Балалар бакчасында эшләүче ике шәфкать туташы да үз эшләрен тиешенчә башкардылар. Шуңадырмы, безнең алай авырган балаларыбыз белән хәзерге ата-аналар кебек җәфаланган булмады.

 

Г.Гыйлемханова язмасының балалар бакчасы чыгарылышына кагылышлысына килгәндә, чыннан да, кайбер ата-аналар балаларына бәйрәм ясыйбыз дип, чамасыз кыланалар. Тәрбиячеләргә, бакча мөдиренә кыйммәтле бүләк өләшү бернинди кысага да сыймый. Алар үзләре үк мондый гамәлдән кыенсынырга, ата-аналарны алдан ук кисәтеп куярга тиешләрдер дип уйлыйм.

 

Җәүдәт ХАРИСОВ. Чаллы.