Казанда мохтаҗларга бушлай кием-салым, ризык, әйберләр тарату пункты эшли

– Безгә халыкның төрле катлавы – күп балалы гаиләләр, аз керемлеләр, сукбайлар мөрәҗәгать итә. Беркемне дә кире бормыйбыз, ничек тә ярдәм итәргә тырышабыз. Исерекләрне генә, иртәгә, айныгач килерсең, дип кайтарып җибәрәбез.

 

Әйберләрне Кукмарага, Норлатка, кыскасы, бөтен Татарстанга таратабыз. Таратабыз дигәч тә, илтеп бирмибез, Казанга килгән вакытларында үзләре алып китә. Башка төбәкләрдән, бүтән милләттән булсалар да, кире борганыбыз, татар, урыс, мөселман, христиан дип бүлгәнебез юк. Безгә килеп, үзләренә ярашлыны сайлап алалар, кемдер киеп тә карый. Зәкят итеп, яңа кием-салым китерүчеләр дә бар. Болар, гадәттә, “Галия”, “Ирада” кебек кием-салым кибетләре (“Мәликә” кебек үзләре таратучылар да бар). Яңаларын беренче чиратта “Мөхәммәдия”, РИУ студентларына тәкъдим итәбез. Рөстәм исемле бер кибет хуҗасы, зәкят итеп, крем, ислемай, тмин, намазлык кебек әйберләр китерә. Шөкер, әйбер китерүчеләр артты. Ни кызганыч, урыныбыз тар. Шуңа күрә артып калганын “Наш дом” фондына, Азат Гайнетдинов оештырган тернәкләндерү  һәм җайлаштыру  үзәгенең Колхоз базары янындагы приютына тапшырабыз. Яшел Үзән шәһәрендәге психоневрология интернатына да ярдәм итәбез (дөрес, алар өр-яңа кием-салым булса гына ала, әле күптән түгел генә  аяк киемнәре һәм джинс чалбарлар бирдек). Инде тотылган кием-салым салым булса, аның юылган, үтүкләнгән булуы шарт.

 

Кием-салым кабул итү пункты дип ачкан булсак та, эшчәнлегебез киңәйде. Хәзер без, ихтыяҗ булганны күреп, йорт-җир, хуҗалык итү өчен кирәкле булган бөтен әйберне алырга тырышабыз. Олы өйгә ни кирәк, кече өйгә шул кирәк, дип әйтәләр бит. Алла сакласын, кешенең йорты янып китәргә мөмкин. Андый казага тап булганнар да килә. Савыт-саба, уенчыклар, урын-җир кирәк-яраклары, пәрдәләр, сумкалар, кер юу, юыну әйберләре дә китерәләр. Дөнья булгач, култык таяклары, инвалид коляскалары кирәк була. Кибеттән сатып алсаң, шактый кыйммәт дип, мөрәҗәгать итүчеләр аз түгел. Электр плитәләре, телевизорлар, сәпидләр, чаңгылар, тимераяклар китерүчеләр дә бар. Аларга да хуҗа тиз табыла. 

 

Кап эчендә, төрелгән булса, халыктан токмач, ярма, шикәр, көнбагыш мае, чәй кебек ризыклар да кабул итеп,  азык-төлек җыелмасы итеп таратабыз. Быел Рамазан аенда мохтаҗларга гомуми күләме 5,5 тонна булган шундый ризык җыелмалары тараттык. Былтыр мондый ярдәм 500 данә булган иде, быел 800гә җитте. Шундый җыелма туплауда булышмассызмы дип, без, гадәттә, хәйриячеләргә мөрәҗәгать итәбез, физик затлар да китереп бирә. Кием-салымга мохтаҗлар мөрәҗәгать иткән очракта берничек тә булыша алмасак, саклау урыныннан алып, шул бер пакет ризыкны булса да биреп җибәрәбез.

 

Гадәттә безгә көненә алты-җиде кеше килә. Яңа әйберләр китерсәләр,   чират та хасил була. Аена ике йөзләп кеше ишек кага. Әйтик, узган ел 1525 кеше килгән булган. Кайдан беләләр дисәгез, социаль челтәрләрдәге төрле төркемнәргә хәбәр җибәрәбез. Әле менә күптән түгел генә яңа җәйге кәчтүмнәр тараткан идек, теләүчеләр күп җыелды. “Азыклата ярдәм күрсәтә алалар”, – дип, журналистлар язып чыккач, атна буе язып, шылтыратып тордылар. 

 

Казанда безнең кебек ярдәм кулы сузучы берничә үзәк бар. Кайберләрендә пенсия кенәгәсе сорыйлар, ниндидер чикләүләр бар. Без бернинди документ сорамыйбыз. Үзебезгә исәп-хисап өчен, килүченең исем-фамилиясен генә язып алабыз. 

 

“Зәкят” фонды җитәкчесе Булат Мәрданов:

 

– Ни кызганыч, очын очка ялгап яшәүчеләр байтак. Ярдәм сорап килүчеләр арасында бик кыен хәлдә калган кешеләр бар. Урта хәлле кеше өчен гади, арзан гына кебек тоелган нәрсәләрне дә кайберәүләр сатып ала алмый. Шул ук вакытта офис ябылып – урындыклар, хосусый балалар бакчалары ябылып,  уенчыклар артып калган очраклар да була. Менә шундый вакытларда безнең кебек арадашчылар кирәк тә инде. Соңгы елларда без, “Мәктәпкә җыенырга ярдәм ит” чарасына кушылып, 1 сентябрь алдыннан мохтаҗ гаиләләрнең балаларына портфельләр таратабыз. Тиешле акчасын хәйриячеләребез түли дә, кибеттән барып алып кайтабыз. Былтыр мөфтиебез шундый 115 балага тантаналы шартларда букча тапшырды. Рамазан аенда яңа туган сабыйларга коляскалар бүләк итү дә бер күркәм гадәткә әйләнеп китәр сыман. Безгә килгән кеше, бер әйбер алмаса да, дәгъвәтсез, нәсыйхәт тыңламыйча чыгып китми. Әле аларга, өйгә кайткач, рәхәтләнеп, иркенләп укырсыз дип,  ислам дине нигезләрен, Пәйгамбәребез кушканнарны аңлаткан дини китаплар, календарьлар бирәбез.