Грант откан фермер

Баксаң, шәһәрдәгеләр эш эзләп, каңгырып йөргәндә авылда калганнары җир җимертеп яшиләр икән. Иске Балыклы авылында яшәүче Раил һәм Резеда ШӘРӘФЕТДИНОВЛАР гаиләсе нәкъ шундыйлардан. Фермер булып теркәлгән Раил һәм Резеда мөгезле эре терлек, кош-корт асрыйлар.

 

- Авыл җирендә мал асрамыйча булмый бит инде. Терлексез йортның яме дә юк, минемчә. Йортыбызда 6 баш мөгезле эре терлек бар. Шуларның икесе - савым сыеры. Кош-кортларны санаган да юк. Тавыклар үз белдеге белән чебеш чыгаралар, артларыннан ияртеп йөртәләр, җим эзләргә өйрәтәләр. Ашарларына сибеп торырга гына өлгер. Йорт киң булгач, тавык-чебешкә иркенлек бездә, - дип көлә Раил Равил улы.

 

Быел ул фермерчылык эше белән ныгытып шөгыльләнә башлаган. Моның өчен өлкә хөкүмәтенең “Начинающий фермер” конкурсында катнашып, өч миллион сумлык грант откан һәм ике миллионына МТЗ-82 тракторы, трактор тырмасы сатып алган, ә калган акчага 20 баш нәселле сыерлар кайтарырга җыена. Аларны урнаштыру өчен мал сарайларын, утарларны ремонтлап куйган, сыерларда лейкоз авыруы булмасын өчен идән-диварларын эшкәрткән. “Малларны бүген үк китерсәләр дә куркыныч түгел”, - ди хуҗа, канәгать елмаеп.

 

Шәрәфетдиновларның чәчүлек җирләре дә бар. Анда мал азыгы өчен үлән һәм бөртекле культуралар үстерәләр. Сыерларны яхшы ашатмасаң, сөтне бирми ул.

 

- Нәселле сыерлар кайткач, эшчеләр дә кирәк булыр инде, - дип дәвам итә сүзен йорт хуҗасы. - Димәк, авылдашларга да эш булачак Ә әлегә бөтен эшкә хатыным белән икәү өлгерәбез.

 

Иртәнге эшләрен тәмамлап кергән Резеда дә кулларын сөртә-сөртә сүзгә кушыла:

 

- Авыл җирендә үскән, мал асрап яшәгән кешеләр без. Шуңа да эш күплеген, авырлыгын тоймыйбыз. Мин үзем авылыбызның социаль бүлегендә дә эшлим бит әле. Эштән кайткач бакчаны, тавык - чебешләремне карыйм, сыерларны савам, сөт аертам, май язам... Барысы да балачактан белгән эш. Булганына шөкер итеп, яратып, куанып эшлибез.

 

Раил һәм Резеда өч кыз үстерәләр. Олысы Регинаның гаиләсе дә бар инде, Рания Самараның Мәдәният институтында, ә Руфина 6 сыйныфта укыйлар.

 

Тормышлары җитеш, мул, йорт-җирләре пөхтә, чиста. Бәрәңге бакчасы да тәртиптә, теплицадагы яшелчәләр дә чәчәктә. Шушы тормышка куанып, исәнлектә яшисе генә калган. Крестьян кешесенә шуннан артыгы кирәкми дә - сәламәтлек, үчтекиләп үстергән кыз-ларыңның тәртипле, эш сөючән булып үсүләрен күрсәң, дөньяң түгәрәк. Туган җирләрен чәчәккә күмеп, киләчәктә дә муллыкта яшәсеннәр, кунакчыллык, хезмәт сөючәнлек сыйфатлары гомер буе саклансын иде.

 

Фәния КӘРИМОВА.