Гөлнара Сабирова Миңназыйм Сәфәровка: "Тормыш барыбер бер күчәр тирәли әй­ләнә"

“Ватаным Татарстан” га­зетасының баш мөхәррире Миңназыйм Сәфәровны вазифасыннан азат итү турындагы мәсьәлә ике көн элек Татарстан Республикасы Дәү­ләт Советының чираттагы утырышында каралды, – диде республика парламенты җитәкчесе урынбасары Римма Ратникова. – Депутатлар әлеге вазифага Гөл­нара Сабированы бил­геләү турында тәкъдимне бертавыштан хуп­лады. 15 ел буе баш мөхәр­рир вазифасын башкарган Миңна­зыйм Сә­фә­ров­ка тагын бер кат ихлас рәх­мәтебезне җитке­рәбез. Утырышта бу хакта депутатлар да кат-кат әйтте. Тиз генә санап та күрсәттеләр: Миңна­зыйм Сәфәров “Ватаным Татар­стан”ны 15 ел 4 ай һәм 3 көн җитәкләгән икән. Бик саллы хезмәт юлы бит бу. Эштә проблемаларсыз да бул­мый, әлбәттә. Гомумән алганда, әлеге чорны уңыш­лы дип бәялим”. Римма Ратникова элеккеге җитәкчегә, республика массакү­ләм мат­бугат чаралары өл­кә­сен­дә фидакарь хезмәте, татар матбугаты үсешенә зур өлеш керт­кәне өчен, Татарстан Дәүләт Советы Рәисе Фәрит Мөхәм­мәтшин­ның Рәх­мәт хатын тапшырды.

 

Теләкләргә Татарстан Премьер-министры урынбасары Ләйлә Фазлыева да кушылды. “Премьер-ми­нистр Алексей Песошин исемен­нән Миңназыйм Сәфәровка, барлык коллективка рәхмә­темне җиткерәм, – диде ул. – Сез уңышлы юл үттегез, ул юл алга таба да дәвам итәчәк. Без бергәләп эшләячәкбез. Бүген республика ирешкән уңыш­ларда сезнең дә өле­шегез зур. Татарстанның уңай имид­жын тудыру бик мөһим һәм бу эш – сезнең кулларда”.

 

“Яңа баш мөхәр­рир – сез­гә таныш кеше, – дип мө­рә­җәгать итте Римма Ратникова редакция коллективына. – Журналистика фа­куль­теты­ның икенче кур­сында укыган вакытта ук Гөлнара Сабирова би­ре­дә эшләп кит­кән. “Ватаным Татарстан” – республикада гына түгел, чит­тә яшәүче татарларны да берләштерүче иң зур газетабыз. 101 еллык тарихы булган басмада татар хал­кының иң абруйлы шәхес­ләре эшлә­де. Без аны тагын да югарырак баскычка күтә­рергә тиеш”.

 

Ләйлә Фазлыева әйтүен­чә, газетага Татарстан Президенты Аппараты тарафыннан да, Министрлар Кабинетыннан да зур өмет­ләр баг­лана. “Мин Хөкү­мәттә социаль мәсьәләләр өчен җавап бирәм. Бу – аз да түгел, күп тә түгел, 14 төрле юнәлеш, ягъни гади халыкны көндәлек тормышта борчыган проблемалар дигән сүз. Сез исә әлеге мәсьәлә­ләрне газета битләрендә яктыртып барасыз. Сезнең тырыш хезмәтегез нәтиҗә­сен­дә без бүген халык белән элем­тәдә торып эшлибез. Алга таба әлеге эшне тагын да кө­чәйтергә телибез. Халыктан җавап ишетеп эшләү бик катлаулы, әлбәттә. Тәнкыйть ишетү рәхәт түгел. Бу юнә­лештә бергәләп эшләя­чәк­без дип ышанам”, – диде вице-премьер.

 

Гөлнара Сабирова 2014 елда “Шәһри Казан” газе­тасының – 2017 елда “Сөем­бикә” жур­налының баш мө­хәр­рире итеп билгеләнгән иде. “Тормыш ничек кенә үзгә­реп торса да, барыбер бер тирәдә әйләнә, – диде ул, моннан 16 ел элек “Ватаным Татарстан”да эшләп китүенә ишарәләп. – Без Миңназыйм Сәфәров белән икебез дә – Исмәгыйль Шәрәфиев мәк­тәбен узган кешеләр. Мин үземне Миңназыйм абый­ның укучысы да дип саныйм. Шуңа күрә безнең карашлар һәм фикерләр уртаклыгы күп. “Ватаным Татарстан” һәр­вакытта да татарның иң абруйлы, дәрәҗәле газетасы булды. Биредәге журналистлар иң осталары дип саналды. Сез әйткән сүз иң дөрес фикер буларак кабул ителде. Бу алга таба да шулай булачак дип ышанам!” Фикерен дәвам иттереп: “Миң­назыйм Сәфәровтан зур мирас кала. Без әлеге дәрәҗәне саклап тотарга тырышачакбыз”, – диде яңа баш мөхәр­рир.

 

“Журналистика ул җиңел эш түгел, монда һәр көнне имтихан тапшырган шикелле. Халык белән элемтә кору да кыен. Башта үзең ышанырга, аннары шуны халыкка җиткерергә һәм кире җавап алганнан соң, маң­гайга бәрмичә генә хаки­мияткә җиткерергә кирәк. Газета – үзенә күрә бер күпер ул. Әнә шул күперне саклый белергә кирәк. Без һәр көн­не тарих язабыз”, – дип, кыйммәтле киңәшләрен бирде элеккеге мөхәррир.

 

Тормыш дәвам итә, без исә бергәләп тарихның яңа битен яза башладык.

 

 

Кадерле укучыларыбыз! Тормыш барыбер бер күчәр тирәли әй­ләнә. Әле хезмәт юлының беренче адымнарын гына атлый башлаганда, миңа беренче журналистика сабакларын биргән “Ватаным Татарстан” газетасына баш мөхәррир итеп билгеләнүем – шуңа тагын бер дәлил.

 

Заман һәрдаим үзгәрештә. Ул үзгә­реш­ләрне беренчеләрдән булып без – матбугат вәкилләре тоябыз түгелме икән әле? Уку­чы­ларның интернетка күчүе, мәгъ­лүмат чыга­накларының артуы, хәбәрнең кө­не тү­гел, сәгате, кайчакларда минуты белән таралуы басма матбугат алдына яңа таләпләр куя.  Шундый шартларда сезне – кадерле укучыларны югалтмас өчен, без әнә шул заман шартларына яраклашырга һәм вакыттан алдарак барырга тиеш. Тик бер нәрсә үзгәреш­сез һәм бәхәссез: “Ватаным Татарстан” гасырдан артык татарның иң абруйлы, беренче газетасы булды. Безнең максат – аны моннан соң да шул югарылыкта тоту. Ул хөкүмәт белән халык арасында күпер, аналитика, фикер, бәхәс, аңлашу мәйданы булырга тиеш. Икътисад, сәясәт, көн хәлләре-ва­кыйгалары, заман сулышына кагылышлы сорауларыгызга җавапларны безнең газетабыз битлә­реннән табасыз икән, димәк, без дөрес юлда.

 

Бергә булыйк, бер-беребезне аңлап яшик!