Татарстанның халык артис­ты Рафаэль Ильясовка 80 яшь тула

Бик күп еллар Советлар Союзы буйлап гастрольләрдә бергә кон­церт куеп йөргән Рафаэль абыйның моңлы тавышы безнең генә түгел, мил­лион­нарның күңеленә сеңгән. Ул җырлаган “Олы юлның тузаны”, “Галиябану”, “Уел”, “Рәй­хан”, “Сандугач”, “Салават ария­се” һ.б. кебек моңлы көйләр – татар һәм башкорт халыкларының мил­ли хәзи­нәсе. Рафаэль Ильясовны бу ике тугандаш халык үзенеке итеп, яратып кабул итте. Уфадагы концертларда аны тамашачылар сәхнәдән, Казандагы кебек, бик озак җи­бәрми иде­ләр. Шулай ук Алма-Ата, Таш­кент, Мәскәү, Ленинград тамашачылары да үз итте­ләр. Рафаэль Илья­совның дуслары Америка, Финляндия ил­ләрендә бүген дә җырлавын көтеп яши.

 

Рафаэль Ильясов 50 ел Татарстан радиосында музыкаль тапшырулар редак­ция­сендә җитәкче булып эш­ләде, баш мөхәррир иде. Ул оештырган концерт­лар­ның профессиональ дәрә­җәсе һәр­вакыт югары булды. Бәй­рәм­нәр саен Башкортстан белән Татарстан концертлар алмашты, ут күршеләр ике республикада да ул концертларны зур тү­земсезлек белән кө­теп  алды. Рафаэль Ильясов эш­лә­гән чорда Татарстан радиосы, Россия радиосы мөм­кин­лекләреннән файдаланып, татар музыкасын Советлар Союзы буйлап ишеттерде һәм чит илләрдә татар музыкасы турында әңгәмә-кон­цертлар оештырды. Ул беркайчан да про­фес­сио­наль җыр­чы­лар­ны үзеш­чән­нәр белән бу­та­мады, ат­на­ның һәр дү­шәм­бесендә үзеш­чән­нәр­нең мах­сус концертларын эфир­га чыгарды.

 

Рафаэль Ильясов һәр­ва­кыт гадел, тугры, ихлас иҗат­чы булды. Һәркемгә олы сән­гать юлына чыгарга эчкерсез ярдәм итте. Аның турында көндәлек матбугатта бик күп мактаулы, җылы язмалар чыкты. Атаклы режиссер, артист, Татарстан Язучылар бер­леге әгъзасы Әхтәм Зарипов “Күпләрне бит җыр­лар очраштыра...” исемле мәкалә­сендә мондый сүзләр яза: “Рафаэль Ильясов чәчеп үстер­гән мәк чәчәкләре басуында, очкан кош авызыннан төшеп  калып, ялгыз үскән көн­багышны хәтерләтә. Кып-кы­зыл чәчәк басуында япа-ял­гыз сары көнбагыш! Купшылыкны яратмаса да, аңа карата шундыйрак сүзләрсез булмый: җырчының күңеле һәм күз карашы, көнба­гыш­тай, гел көнгә, кояшка, яктылыкка юнәлгән. Шулай тың­лаучы­сын да үзенә ияртә ул, милләт­нең иң моңлы, иң зарлы көйләре дә аның башкаруында нәфис­леккә, яктылыкка өн­диләр, өмет, ышаныч уятырга юнә­ләләр! Җыр­чының кыйбласы билгеле, ул – гомерлек”.

 

Бу тансык, кадерле җыр­чыбызга апрель аенда 80 яшь тула. Киләчәк олы юбилеең белән котлыйбыз, Рафаэль абый!

 

Күптән түгел К.Тинчурин исемендәге Татар дәүләт драма һәм комедия театрында бу­лып узган Татарстан ра­дио­сының 50 еллык юбилеенда Рафаэль Ильясов җыр­лагач, халык аягүрә басып, көчле итеп, озак кул чапты. Бу – хезмәттәшләренең һәм кил­гән кунакларның аңа булган иң зур хөрмәт билгесе. 80 яшь­лек юбилееңда да шулай булыр дип өметләник. Исән-сау булырга язсын!