Миләүшәнең яңа тормышы (ГЫЙБРӘТ ӨЧЕН)

“Бер ай элек Алсу апам авылда киштәне актарганда бер кочак мактау кәгазь­ләре табып, шуларны күтә­реп кер­де. Баксаң, ми­некеләр икән: мәк­тәптә укыган вакытта алганмын. Сыйныфта иң активлары идек без. Чаңгы, җиңел атлетика, винтовкадан ату, волейбол, баскетбол һәм башка спорт төрләрендә район күлә­мен­дә җиңүче­ләр булып исәп­ләндек. Имгәнгәч, болар хакында онытып торырга туры килде”, – дип искә ала үт­кән­нәрен Ми­ләүшә апа. Юл фа­­- җ­игасендә ул утырган машина биек кү­пердән аска оча. “Ашыгыч ярдәм”, та­биб­лар, операция, хас­таха­нә ятагы – тормышка әйлә­неп кайту җиңел булмый. Ниләр ки­чергәнен хә­зер исенә дә төшерәсе килми.

 

Аннары яңа тормыш өчен көрәш башлана. Спорт – әнә шу­ның бер бизәге тү­гел, мәгъ­нәсе дә. “Ун ел ти­рәсе үткәч, янәдән спортка кайттым. Моның сә­бәп­чесе һәм миңа этәргеч би­рүче – инвалидлар җәм­гыя­тенең тренеры  Вәсимә Имамова. “Юрүзән” спорт фес­ти­ва­лендә мин икенче ел рәттән катнашам. Татарстан җыел­ма командасы җи­тәкчесе Раил Шәрәфиев: “Фес­тивальдә катнашырга көчле куллы хатын-кызны эз­ләдем”, – дип, мине сайлады. Штанга күтәрү һәм кул көрәше буенча Татарстан чем­пио­натын­да беренче булуымны бел­гәннәр. Фес­тивальдә беренче булып чыгыш ясарга туры килде. Беренче булу, билгеле, авыр инде. Шуңа күрә тәүге ярышта мин өченче урында калдым”.

 

Икенче көнне алар көй­мәдә ярыша. Иртән ир-егетләр булса, төштән соң хатын-кызларга чират җитә. Бу вакытта елгада су кү­тәрелеп, агым тагын да кө­чәя. Әмма Миләүшә апа бирешми, беренчелекне ала. “Биредәге соңгы ярыш текә кыяга менү иде. 30 градус эсселек, озын җиңле кием белән күпме бауга чолганырга кирәк. Авырлыгын сизмәдем дә. Менә мин 20 метрлы кыяның иң өстендә: бер ягында – ташлы тау, икенче ягында ямь-яшел урманлы, сулы тигезлек җә­елеп ята. Үзем, мине тизрәк фотога тө­шер­сен дип, аста бауны тотып торучы тренерыма кычкырам. Көн­дәш­ләрем: “Бу ханымны башка алып килмәгез”, – дигәннәр. Кыс­касы, бу ярышта да беренче булдым.

 

Узган ел Кырымда үткә­релгән Бөтенроссия фес­тивалендә катнашып, штанга күтәрү буенча икенче урын­ны алып кайта Ми­ләү­шә апа. Татарстан чемпионатларында катнашып, беренче урынга лаек була. Штанга күтәрү, кул көрәше, теннис, чаңгыда шуу, өстәл уеннары дисең­ме... “Ел ха­тын-кызы” бәй­гесендә катнашып, “Ел үрнәге” но­ми­на­ция­сендә республика күлә­мендә беренче урынга лаек булуын да горурланып искә ала ул.

 

– Чит илләрне гизәргә яратам. Гарәп Әмирлекләре, Израиль, Испания, Вьетнам, Һиндстан, Иордания, Тунис, Мисыр, Төркия һәм башка илләргә барганым бар. Туган ягыма кайткач, күр­гәннәрем турында газетага язам. Апа һәм җизни белән Россия киң­лекләре буйлап сәяхәт итә­без. Инде шактый җир­ләрдә булдык, – ди ул.

 

Миләүшә апа – уңган ху­җабикә дә әле. “Кышка кыярын, помидорын, төрле җи­мешләрдән компот, кайнатмалар ябам. Нинди камыр ризыгы кирәк, барысын да пешереп бирә алам. Үр­мәләп, идәнен дә юам. 1995 елдан бирле рульдә йөрим. Нинди генә машинам булмады инде, – ди ул. – Кызганганнарын яратмыйм. Нинди ге­нә хәлгә юлыксаң да, үзеңне яратырга кирәк. Бары шулай эш­ләгәндә генә кимчелек­лә­рең­не сизми башлыйсың!”