12.04.2018 Мәдәният

Энҗе һәм Илфат Камалиевлар өйләнешү серләрен чиште

Энҗе һәм Илфат Камалиевлар — Кариев театры артистлары. Училищеда танышкан яшьләр кулга диплом алып, шактый еллар эшләгәч кенә кавыша.

— Энҗегә бер күрүдә гашыйк булдым! Гел артыннан күзәтеп йөрергә тырыштым. Әмма башта берьяклы гына мәхәббәт булды. Игътибар бирмәде. Кыргый иде, качып йөрде, — ди Илфат, елмаеп.

— Дуслар булырбыз, әмма кияүгә чыкмыйм, дидем. Шуннан ул: “Беркөнне килеп, Илфат, миңа өйлән, дип үзең әйтәчәксең әле”, — ди. Шулай булды да, — дип искә ала Энҗе. — Сабыр гына көткәне, мине яратканы, мәхәббәтне саклап калганы өчен, Илфатка рәхмәтлемен...

— Икегез бер театрда эшләү җайлымы?

Энҗе:

— Бик җайлы. Кызыксынулар бер, гастрольдә бергә, эшең турында рәхәтләнеп сөйләшәсең...

— Көнләшү юктыр?

Энҗе:

— Бу хакта еш сорыйлар. “Ирең (хатының) башка белән кочаклаша, пәп итешә. Кыен түгелме?” — диләр. Эш бит ул! Театр — бер гаилә. Әгәр төрле җирдә эшләсәк, бәлки, бераз сизелер иде. Ә болай 24 сәгать бергә.

Илфат:

— Эштән дә көнләшсәк, димәк, һөнәрне белеп сайламаган булып чыгабыз...

— Клипларда да күренәсез.

Илфат:

— Былтыр клиплар елы булды. Гөлдания Хәйруллинаның “Узган гомер жәл булмый”, Таңсылуның “Тугры йөрәк” дигән җырына эшләнгәннәрен кайбер каналлар еш күрсәтә. Соңгысы — Нурзадәнең “Әйтмә син авыр сүз” җыры. Үзем дә клиплар төшергәлим.

— Энҗе, “Тантана” премиясе иясе булдың. Ул нинди роль өчен бирелде?

— 2013 елда “Иң яхшы хатын-кыз роле” номинациясендә “Нигез ташлары”нда Гөлҗиһан роле өчен бирелде. Премия канатландырды.

— Театрга ничә ел гомерегезне багышладыгыз?

— 23 ел була! Яңа бинага күчәргә торабыз. Шундый сөенечләр белән яшибез.