24.10.2017 Мәдәният

"Һөнәр" фестивалендә Россиянең әйдәп баручы педагоглары мастер-класслар бирә

IX «Һөнәр» Бөтенроссия яшь татар режиссурасы фестивале Казанда 9-14 декабрь көннәрендә уза. Быелгы фестиваль кысаларында беренче тапкыр Татарстаннан һәм якын төбәкләрдән килгән яшь режиссерларның спектакльләреннән торган традицион программадан тыш, Россиянең әйдәп баручы педагогларының мастер-класслары үтәчәк.

«Һөнәр+» режиссура буенча белем бирү лабораториясе комедия темасына багышлана. Лабораторияне, традиция буенча, «Реальный театр» Бөтенроссия фестивале директоры, Екатеринбург шәһәренең Яшь тамашачылар театрының директор урынбасары Олег Лоевский җитәкли.

Мастер-классларны һәм семинарларны заман театрының танылган белгечләре уздырачак. Алар арасында: “Небольшой драматический театр” җитәкчесе, «Алтын битлек» премиясе лауреаты, педагог, режисер Лев Эренбург (Санкт-Петербург), 70тән артык спектакльгә костюмнар һәм декорацияләр иҗат иткән, «Алтын битлек» премиясе лауреаты, театр рәссамы Юрий Хариков (Мәскәү), «Алтын битлек» премияләре номинанты, мультимедиа режиссеры Наталья Наумова (Мәскәү).

IX «Һөнәр» фестиваленең географиясе Мәскәү, Санкт-Петербург, Тольятти, Уфа, Әлмәт һәм Казан шәһәрләрен колачлый. Барлыгы афишага татар һәм рус телләрендә 15 спектакль кертелгән. Спектакльләр Казанның 7 театраль мәйданында: Камал театрының Зур һәм Кече сәхнәсендә, “Әкият” курчак театрында, "Угол" иҗат лабораториясендә, Яшь тамашачылар театрында (ТЮЗ), М.Сәлимҗанов исемендәге Актерлар йортында һәм АРТХАБ Арт-резиденциясендә узачак.

---
Камал театры
№ --- | 24.10.2017