КОТЛЫЙБЫЗ!

Рәссам, Татарстанның атказанган мәдәният хезмәткәре Лилия Золондиновага 55 яшь.

Лилия Сәгадәт кызы Золондинова Татарстанның Мөслим авылында туа. 1976 елда Казан сәнгать училищесын тәмамлагач, Татарстан китап нәшриятында бизәлеш редакторы булып эшли башлый. 1992 елдан «Мәгариф» нәшриятында китап бизәлеше редакциясе мөдире вазифасын башкара.

Л. Золондинова китап бизәү һәм графика ысулында эшләүче рәссам буларак билгеле. «Мәгариф» нәшрияты китапханәсе», «Милли әдәбият китапханәсе», «Татар әдәбияты дөньясы», «Нәниләр китапханәсе», «Балалар күңеле» серияләрендәге китаплар аның бизәлешендә дөнья күрде.

Рәссам буларак, ул 1 нче сыйныф өчен «Татар теле», «Биюче бака», «Сандугач оясы», (Ф. Яруллин), «Урман сукмаклары» (Ф. Хөсни), «Тау битендә күләгә» (Ф. Шәфигуллин), «Белмәмеш маҗаралары» (Н. Носов), «Чәбәк-чәбәк итә ул» һ. б. бик күп китапларга иллюстрацияләр ясады, нәшриятта 35 еллап эшләү дәверендә китап бизәү сәнгатенең чын остасына әверелде, ул бизәгән югары зәвыклы басмалар Бөтенроссия китап конкурсларында дипломнар белән бүләкләнде.

Люция ГЫЙЗЗӘТУЛЛИНА

* * *

Хөрмәтле Лилия Сәгадәтовна!

Гомер дигәнең шулкадәр ашыгыч нәрсә икән: көннәре-айлары-еллары җитез генә үтә дә тора,  күз ачып йомарга да өлгермисең, инде яртысы узып та киткән була. Зәмһәрир суыклы кышларда тусаң да туктап тормый, өшеп-катып калмый икән гомер сәхифәләре: тарихи Матбугат йорты баскычларыннан күбәләктәй очып кына йөргән талчыбыктай Лилияне салмак, затлы, «солидная» Лилия ханымга әйләндергән дә куйган. Шул арадагы вакыт сизелмәгән дә сыман! Әмма бу беренче карашка гына шулай. Китапка багышланган 35 еллап гомер ташка басылган дип әйтерлек еллар икән бит! Нәшрият эшендәге «китапның бизәлеш редакторы» һәм «тышлык рәссамы» хезмәтләре үз эченә бик зур мәгънәне сыйдыра – китапка күлмәк кидерүче дигән сүзләр алар. Киемеңә карап каршы алалар, дигәндәй, тышлыгына карап, китап турында беренче фикер туа. Кулыңа алып, битләрен ачуга – бизәлешен күрүгә – икенче фикер… Лилия ханымның кулы тигән һәр китап, һәр рәсем, үзе яратып тегеп кигән һәр костюмы, аңа килештереп сайланган алка-брошкасы, яулык-шарфигы, хәтта чәч каптырмасының төсе һәм формасы кебек, үтә зәвыклы һәм килешле. Җәй җитүен түземсезләнеп көтеп, бакчасында җилкенеп-җилкенеп матур чәчәкләр, куаклар үстерүенә, вазага утыртып куйса, гап-гади чүп үләненең гөлгә әверелүенә, бушаган чәй-конфет тартмаларын өр-яңа  «эшкә» җигә белү һәвәслегенә ничек сокланмыйсың да ничек гаҗәпләнмисең!..  Ирексездән,  «рәссам шул» дип куясың…

Лилия ханымның нәшрият хезмәтенә багышланган гомере нәшрият йөзен бизи. Аның башкарган эшләрен – күз нурларын биреп, күңел җылысына төреп ясаган рәсемнәрен карап, меңәрләгән сабый куангандыр. Татарстанда гына түгел, Россия күләмендәге конкурсларда призлы урыннарны яулаган китаплары гына да бер йөк аның. Нәшриятта һәр китап бизәлеш редакциясе мөдире Лилия Сәгадәтовна фатихасы белән дөньяга чыга. Һәр эшләгән эшең турыдан-туры халык каршына чыксын әле! Ныклап уйласаң, сирәк кешеләргә генә тия торган бәхет бит бу. Без, аның белән бергә Галиҗәнап Китап тудыручы хезмәттәшләре, бу бәхетнең дәвамлы, йөрәк җылысын биреп башкарган эшенең хөрмәтле булуын телибез!

Кадерле хезмәттәшебез!

Без Сезгә озын гомер, тигез гаилә бәхете, балаларыгызның игелеген, рәхәтен, булачак оныкларыгызның шатлыгын күреп, сөенечтә, бәхеттә-муллыкта яшәвегезне телибез.

Иң изге теләкләр белән,

«Мәгариф» нәшрияты хемәткәрләре.

2010 ел, гыйнвар.