«Печән базары» фестивале быел Черек күлдә үтәчәк

Быел Бөтендөнья татар яшьләре форумы үткәрә торган “Печән базары” фестивале 19 августта Черек күлдә булачак. Бу хакта Форумның лидеры Тәбрис Яруллин Фейсбугында хәбәр итә.

Быел базар берничә мәйданчыкка бүленәчәк. Традицион дизайнерлар үз әйберләрен сатачаклар, алар 100гә якын (былтыр 60 иделәр), бик күп "новичоклар" көтелә.

Икенче мәйданчык - Аш-су (фудкорт). Башка елларны сатырга кафе һәм кофейнялар гына килсә, быел теләсә кем өйдән пешереп әйберләр алып килә ала. Европада таралган ресторан көне кебек булачак. Ат итеннән шашлык һәм казылык, пәрәмәч, бәлеш һәм чын эре төшле чәкчәк, Мари кырларында җыелган үләннәрдән чәй - боларны барысын да моңарчы өйдә генә пешереп ятучылар алып килеп сатачак. Сез дә кушыла аласыз) алдан язылу гына кирәк.

Ашау бер, белем җыярга да мөмкин булачак. Талкыш кәлавен ясау мастер-классы, веган татар ризыклары турында лекция, дусларыбыз "Түбәтәй" һәм яңа бренд - "Еда татар"дан уникаль рецептлар булачак.

Шопинг булды, ашадык-эчтек, өченче мәйдан - Уку паркы. Кергәч тә сезне шигъри бүлмә көтәчәк. Нәрсә икәнен әйтмиләр, бу уникаль бер идея. Әлбәттә лекцияләр булачак, 100 ел элек хатын-кызларга караш, татар байлары һәм федерализм (!) турында сөйләрләр. Сөмбел Гаффарованың "Кораб" спектакле укылачак, шигъри слэм һәм кичен фильмнар булачак. Кем дә кем Рәхимбайның, Салават абыйның һәм Рәдифләрнең фильмнарын күрмәгән - рәхим итегез. Байбулат, сүз уңаеннан, яңа кыска фильмының сценарие өчен кинотаврда билгеләнде, нәрсә өчен икәнен дә шушында беләчәкбез.

Был тагын бер яңалык - бию. Бию for you. Парк һәм бию бик табигый парлар, сезне монда Нигина 15 минут эчендә биергә өйрәтәчәк!

Ачык экскурсияләр дә була. Сирәк очрый торган китаплар, татар уенчыклары һ.б. да булачак.

Сабыйлар да онытылмаячак. Алар өчен программаны Сабыйлар үзәге һәм Кид спейс әзерли. Гыйлемнәрнең үз кәттә мәйданнары булачак.

#печэнбазары #tatforum #татфорум