Искәндәр Сираҗи ай башында усал, ай ахырында "сары" газета чыгара башлаган

2017 елның июленнән "Сираҗи сүзе" газетасы айга ике тапкыр чыга башлады. Әмма ай дәвамында чыккан ике номер бер-берсенә охшамый торган булачак икән.

Ай башында 48 битлек булып, Искәндәр Сираҗи әйтмешли, "усал" номер чыгачак. Ә айның икенче яртысында нибары 24 битле - "сары" номер. Гәрчә, Сираҗи үзе бу "сары гәҗит" дигән сүзне бик үк яратып бетерми, "җиңел укыла торган" диюне кулай күрә икән.

"Җиңел укыла торган" саны бүген килде. Кулга тотышка бик юка (бармаклар элеккеге калын "Сираҗи сүзе"нә ияләнгән). "Акчарлак" һәм "Ирек мәйданы" кебек өстәге перфорациясен ертып укыйсы. 48 битле "Сираҗи сүзе", хәтерләсәгез, китап сыман уртадан төпләнгән булып чыга.

Җиңел укыла торган беренче сан

Баш мөхәррир әйтүенчә, бу адым икътисадый сәбәпләр белән аңлатыла. Укучылар газетаны ешрак күрергә тели. Әмма шул ук вакытта айлык бәяне дә арттырырга ярамый. Алга таба планнары 24 битлек "сары" газетаның бит саннарын арттыру һәм 48ле булгач кына төпләп чыгару.

Газета, гадәттәгечә, "Мөхәррир мөнбәре" белән башланып китә

Бүген килгән "җиңел укыла торган" "Сираҗи сүзе"ндә әлеге басмага моңарчы ят булган кайбер темалар урын алган: Америкада яшәүче җырчы Иделия белән интервью, гөлләр үстерү серләре, җәйге коктейль рецепты, "Син кайсы хайван?" дигән йолдызнамә һ.б. Өйләнми йөргән 32 яшьлек бер егет журналист Эльвира Фатыйховага күңелен ачкан. Баксаң, егет саф кыз эзли икән. Ромашка бәйләме күтәреп беренче свиданиега барса, кызлар "ал мине, мин сине телим" дип каршы алалар икән. Әлеге язма "Кызлар, бирмәгез!" дип атала. Үзенчәлекле теманы Наилә Хисамованың бер полосалык "Имидәмени соң бәхет?!" дигән язмасы дәвам итә. Язма менә шушылай иллюстрацияләнгән:

"Сары" дигәч тә, яңа номердагы һәр язма да сары түгел. Бәрәңге темасына багышланган җитди язма, социаль юнәлештәге "сез шалтыраттыгыз - без җавап бирәбез" кебек нәрсәләр, Жириновский, Ткачев, Онищенколар да бар монда.

Моңарчы татар матбугатында газетаның бер номерын җитдирәк, икенчесен җиңелрәк итеп чыгарып караучылар юк иде кебек ("Шәһри" һәм "Ватаным" "толстушкалары" - башка күренеш). "Сираҗи сүзе"нең бу эксперименты ничек дәвам итәр - күрербез.