Синоптиклар җәйнең беренче көненә ҺАВА ТОРЫШЫның ничек булачагын фаразлады

Татарстан Гидрометеорология һәм әйләнә-тирә мохитне күзәтү идарәсе алдагы өч көнгә үз фаразларын җиткерде. Республика синоптиклары китергән мәгълүматларына караганда, 30 май көнне алмашынучан болытлы һава торышы көтелә. Урыны белән көчле яңгыр.

Җил көньяк-көнбатыштан һәм төньяк-көнбатыштан исә, уртача тизлектә. Шул ук вакытта җилнең тизлеге секундына 15-20 метрга кадәр җитеп, көчәю ихтималы да фаразлана. Минималь температура төнлә – +3..+8, көндез максималь һава температурасы +14..+19 градус булачак.

31 майда алмашынучан болытлы һава торышы көтелә. Явым-төшем күзәтелми. Җил төньяк-көнбатыштан, җиңелчә. Төнлә минималь һава температурасы – +2..+7; көндез максималь температура +13..+18 градус булыр дип көтелә.

1 июньдә шулай ук алмашынучан болытлы һава торышы күзәтелә, дип хәбәр итә Татар-информ. Төнлә урыны белән бераз яңгыр сибәләргә мөмкин. Көндез күпчелек районнарда яңгыр, урыны белән яшен көтелә. Җил көньяктан, уртача. Шул ук вакытта иртән һәм көндез тизлеге секундына 15-20 метрга кадәр җитү ихтималы да бар. Җәйнең беренче көнендә төнге минималь температура – +5..+10, көндез максималь һава температурасы +18..+23 градус булачак, дип фаразлый синоптиклар.